Paytaxtın köçürülməsi reallaşa bilərmi?
22 Oktyabr 2013 16:56 (UTC+04:00)
"Azərbaycanın paytaxtının yaxın gələcəkdə başqa əraziyə
köçürülməsindən söhbət gedə bilməz. Paytaxtı yerinin
dəyişdirilməsinə nə strateji, nə də ki, digər səbəblərdən etiyac
yoxdur".
Bu sözləri Movqe.az-a açıqlamasında Dövlət
Şəhərsalma və Arxitektura Komitəsinin şöbə müdiri Cahangir Qocayev
deyib. C. Qocayev bildirib ki, Bakı tarixi nöqteyi nəzərdən ən
qədim şəhərlərdən biridir. Üstəlik Azərbaycanın şöhrətini
dünyaya yayan qara qızıl sərvəti də məhz Bakıda çıxır. C. Qocayev
Bakının öz resurslarına görə hələ tükənmədiyini də söyləyib. Onun
sözlərinə görə, Azərbaycan gənc dövlət olduğundan dünyaya paytaxtı
Bakı kimi tanınıb. Digər tərəfdən isə iri layihələrin paytaxtda
həyata keçirilməsi Bakının dünyada əzəmətini artırmaqdadır. Belə
bir vaxtda paytaxtın başqa yerə köçürülməsi lüzümsuzdur.
Əməkdar memar Feyzulla Quliyev də Movqe.az-a açıqlamasında bildirib
ki, paytaxtın köçürülməsinin effektli bir dəyişiklik ola
abilməz: "Dünyada paytaxtların köçürülməsi təcrübəsi göstərir ki,
bu memarlıq və infrastrukturun formalaşdırılması baxımından elə də
asan məsələ deyil. Bir də ki, Azərbaycanda buna ehtiyac duyulmur.
Bakıda hələki yer tükənməyib. Biz paytaxtın dəyişdirilməsini
yox, Bakının bir qədər boşaldılmasını dəstəkləməliyik. Yəni Bakının
mərkəzində tarixi əhəmiyyət kəsb etməyən ali təhsil ocaqlarının
yeri dəyişdirilə bilər. Elə ali təhsil ocaqları və qurumlar var ki,
onların yeri Bakının mərkəzindən bir qədər kənara köçürülməlidir.
Beləliklə paytaxtın mərkəzini bir qədər boşaltmaq və tarixiliyini
qorumaq olar. Amma paytaxtın köçürülməsinə ehtiyac yoxdur. Həmçinin
də bu küllü-miqdarda vəsaitin boşa xərclənməsi ola bilər. Əgər
gələcəkdə cənubi Azərbaycandakı torpaqlarımız qaytarılarsa
paytaxtın Təbriz olması barədə düşünmək olar".