263 saylı məktəb: "Özümüzün qazanxanamız var"
307 saylı məktəb: "İstiliyin güclü olmasından..."
67 saylı məktəb: "Problem yoxdur"
Cümşüd Nuriyev: "Kənarlarda bir qədər problemlər yaşanır"
Qışın gəlməsi orta məktəblərin də qayğısını birə-beş artırır. Bu
zaman məktəbin istilik sistemilə təminatı məsələsi bütün çılpaqlığı
ilə ortaya çıxır. Son illər təhsil ocaqlarının istiliklə
təminatında bir sıra işlər görülüb. Bakının bəzi məktəb və uşaq
bağçaları fərdi qaydada qazanxanalarla təmin olunub. Bu sistemə
qoşulmayan sözügedən müəssisələr isə istilik sisteminə
mərkəzləşdirilmiş qaydada qoşulub. Amma bunları əsasən şəhərin
mərkəzindəki məktəblərə şamil etmək olar.
Verilən məlumatlara görə isə şəhərətrafı məktəblərdə vəziyyət elə
də yaxşı deyil. Onlar mərkəzləşdirilmiş istilik sisteminə
qoşulsalar da kənar ərazilərdəki məktəblərin istiliklə bağlı
problemləri mövcuddur. İstiliyin lazımi səviyyədə olmaması üzündən
bir çox məktəblərdə şagird və müəllimlər otaqda belə palto ilə
oturmaq məcburiyyətində qalır. Yaranmış vəziyyətdən çıxış yolu kimi
isə bəzi məktəb və bağçalarda valideynlərdən "pletka" pulu da
yığılır. Bütün bunlar isə bir daha həm mənzilləri, həm də ictimai
obyektləri istiliklə təmin etməli olan "Azəristiliktəchizat"
ASC-nin heç də vəzifəsinin öhdəsindən uğurla gəlmədiyini göstərir.
Məktəblərdəki istiliklə bağlı vəziyyəti öyrənmək üçün həm tədris
müəssisələrinin özlərinin fikirləri, həm də ekspertlərin rəylərilə
tanış olduq.
Xətaidə yerləşən 1250 şagirdin təhsil aldığı 263 saylı məktəbin
direktoru Bayram Qasımov bu sahədə hər şeyin normal olduğunu
söylədi: "İstilik sistemi tam şəkildə öz həllini tapıb. Özümüzün
qazanxanamız var. Otaqlarda istilik normal dərəcədədir. Amma bəzi
hallarda şagirdlər sinif otağında palto ilə oturur. Bu da onunla
bağlıdır ki, pəncərələr köhnədir. 31 ilin məktəbidir. Bu ilin
yazında əsaslı təmir gözlənilir. Pəncərələr dəyişdirilib plastik
olanda istiliyin səviyyəsi daha yaxşı olacaq".
Sabunçu rayonundakı 307 saylı məktəbin direktoru İqbal Kərimovun da
istiliklə təminatdan şikayəti yoxdur: "Özümüzün qazanxanası var,
normal şəkildə yanır. İstiliyin güclü olmasından uşaqlar bir sıra
hallarda pəncərələri də açır. Bu barədə problemimiz yoxdur.
Məktəbin istiliklə təminatı 2007-ci ildən öz həllini tapmışdı".
67 saylı məktəb direktorunun müavini Azad Kələşov da istiliklə
təminat barədə optimist danışdı: "Noyabrın 15-dən istilik sistemi
işləyir. Məktəb normal şəkildə qızdırılır. Problem yoxdur. Özümüzün
ayrıca qazanxanamız mövcuddur ki, 2007-ci ildən məktəb bu sistemlə
qızdırılır".
Bakı Şəhər Təhsil İdarəsinin mətbuat xidmətinin rəhbəri Zəminə
Əliqızı da məktəb və bağçaların qışa tam hazır olduğunu diqqətə
çatdırdı: "İki tədris ili bundan öncə Təhsil Nazirliyilə
"Azəristiliktəchizat" Səhmdar Cəmiyyətinin xəttilə Bakıda yerləşən
bütün ümumtəhsil məktəblərinin istilik sistemləri tam olaraq
yeniləşdirilib. Hal-hazırda Bakıda yerləşən məktəblərin demək olar
ki, 50 faizində fərdi qazanxana mövcuddur. Yerdə qalan yarısı da
mərkəzləşdirilmiş qaydada istiliklə təmin olunub. Bakının 153
məktəbinin fərdi qazanxanası var. 157 məktəb isə mərkəzləşdirilmiş
qaydada istiliklə təmin olunub. Bağçalara gəldikdə, münasibət bir
qədər fərqlidir. 275 bağça istiliklə mərkəzləşdirilmiş qaydada
təmin olunur və cəmi 31 bağçada fərdi qazanxana sistemi işləyir.
Noyabrın 15-də qış vaxtına rəsmi keçiddən sonra isə bütün
məktəblərimizdə istiliklə bağlı heç bir problem yaranmayıb. Bəzi
məktəblərdən ilk günlərdə bizə müraciətlər olunmuşdu ki, sistem
işləmir, bu sahədə narahatlıq var. İndi həmin məktəblər də
nəzarətdədir, işlər aparılır. Belə məktəblər şəhərin həm mərkəzi,
həm də kənarında yerləşən məktəblərdir. Həmin məktəblərdə problem
sırf texniki səbəblər üzündən yaranmışdı. İndisə artıq aradan
qaldırılır. İstilik veriləndən sonra kimdəsə narahatlıq
yaranmışdısa, onlar dərhal bizi məlumatlandırıb. Bizdə öz
növbəmizdə müvafiq dövlət qurumlarını o məktəblərə göndərdik, indi
onlar həmin yerlərdə bu işləri həyata keçirir. Lakin bunlar istilik
sistemilə bağlı olaraq yaranan problemlər deyil, sadəcə texniki
xarakterli narahatlıqlardır. Bağçalarla bağlı vəziyyət bir qədər
fərqlidir. Onların böyük əksəriyyəti mərkəzləşdirilmiş qaydadadır.
Az sayda bağça isə fərdi qazanxana quraşdırılıb. Onlar da son illər
istifadəyə verilən uşaq bağçalarıdır. Amma onlarda da artıq istilik
mövcuddur. Son illər istifadəyə verilən bağçaların demək olar
hamısında kombi sistemi qurulub. Ona görə də zaman-zaman bağçalarda
da fərdi qazanxanaların yaradılması istiqamətində işlər
aparılacaq.
Bağçalarda da problem yoxdur. Hər halda Bakının təhsil müəssisələri
qış mövsümünə tam hazırdır. Yeganə narahatlığımız mərkəzləşdirilmiş
qaydada istiliklə təmin olunan müəssisələrlə bağlıdır. O da onunla
bağlıdır ki, məktəbin yerləşdiyi ərazidə mavi yanacaqla əlaqədar
hansısa bir problem yaranarsa, belə halda həmin qəsəbədə yerləşən
məktəblərdə də istilik istiqamətində problem yaranacaq. Hər halda
strateji məqsəd olaraq düşünürük ki, gələcəkdə hər bir təhsil
müəssisəsinin fərdi qazanxanası olsa daha yaxşı olar".
Müstəqil ekspert Cümşüd Nuriyev isə bu fikirdədir ki, mərkəzdəki
məktəblər istiliklə yaxşı təmin olunsa da bunu Bakının ətrafındakı
təhsil müəssisələrinə aid etmək olmaz:
"Nəvəm Nərimanov rayonu ərazisindəki liseyə gedir. Hələlik burada
istiliklə bağlı bir problem yoxdur. Çünki həmin məktəbin direktoru
elmlər doktorudur. Amma digər məktəblərdən xəbərim yoxdur.
Fikrimcə, Bakının mərkəzində vəziyyət yaxşıdır. Kənarlarda bir
qədər, bildiyimə görə, problemlər yaşanır. Xüsusən də Bakının ətraf
rayonları, məsələn, Binəqədi, Qaradağ, Xəzər, Sabunçu, Suraxanı
məktəblərində problem onunla bağlıdır ki, paytaxt qışa hazır deyil.
Dəfələrlə bu məsələnin qaldırılmasına baxmayaraq, problem həllini
tapmır".
Rüfət NADİROĞLU