"Dağlıq Qarabağ münaqişəsi “Şərq tərəfdaşlığı” proqramına əngəl törədir"
29 Noyabr 2013 14:50 (UTC+04:00)
Vilnüsdə "Şərq tərəfdaşlığı" Sammitində iştirak
edən Milli Məclisin deputatı, Milli Məclisin Beynəlxalq
münasibətlər və parlamentlərarası əlaqələr komitəsinin sədri,
Avropa Şurasının Parlament Assambleyasında Azərbaycan nümayəndə
heyətinin rəhbəri Səməd Seyidov mətbuata açıqlama
verib.
Azərbaycan Dillər Universitetindən ANS PRESS-ə
verilən məlumata görə, Səməd Seyidov Azərbaycan öz mövqeyini
konkret olaraq ortaya qoyduğunu bildirib və Azərbaycanın Avropa
istiqamətində inteqrasiyası hamı üçün aydın və heç bir mübahisə
yaratmayan bir məsələ olduğunu deyib.
"Bu nöqteyi-nəzərdən Avropa strukturları və Avropa
dəyərləri məsələsinə aydınlıq gətirilməlidir. Azərbaycan Avropaya
Avropa dəyərlərini mənimsəmək üçün, bu dəyərləri Azərbaycana
gətirmək üçün inteqrasiya edir. Bunlar demokratiya, qanunun aliliyi
və insan haqlarıdır. Lakin, heç bir təşkilata, o cümlədən Avropada
olan təşkilatlara bu dəyərləri öz dəyərləri kimi təqdim etmək
ixtiyarı verilməməlidir. Yəni, Azərbaycanın Avropaya inteqrasiyası
hansısa beynəlxalq təşkilatla əlaqələri qurmaq naminə deyil, məhz
Avropa dəyərlərini mənimsəmək və həmin sivil ölkələrdə qəbul
olunmuş beynəlxalq qanunları, demokratiyanı, insan haqlarını
Azərbaycanda yüksək səviyyədə tətbiq etməkdir".
O, qeyd edib ki, bizim avropalı tərəfdaşlar "Şərq
tərəfdaşlığı" proqramında iştirak edən ölkələrdə gedən prosesləri o
qədər də ciddi təhlil etmirlər. Avropa Birliyi, Avropa Parlamenti
yalnız bu "Şərq tərəfdaşlığı" üzvləri olan ölkələrdə problemlər
axtarmaqla məşğul olmamalıdır, o cümlədən bu qurumun "Şərq
tərəfdaşlığı" proqramının belə ləng və bəzən düzgün olmayan
istiqamətdə inkişaf etməsinin səbəbini axtarmalı, düzgün təhlil
aparılmalı, məsələ və reallıq düzgün qiymətləndirilməli, ikili
standartlar və bu kimi faktlar olmamalıdır.
"Nəhayət, bizim üçün ən əsas və mühüm məsələ
Dağlıq Qarabağ məsələsidir. Azərbaycan regionun bütün sağlam
qüvvələri ilə əlaqə yaratmaqda maraqlıdır. Lakin, təəssüf ki,
indiki vəziyyətdə belə regional əməkdaşlığa nail olmaq həlli çətin
məsələdir. Dağlıq Qarabağ münaqişəsi bu əlaqələrin qarşısını alır
və bu münaqişənin mövcudluğu əlaqələrin inkişafına mane olur. Bunu
da yaddan çıxarmaq lazım deyil ki, bu münaqişə "Şərq tərəfdaşlığı"
proqramının inkişafına da əngəl törədir".