Qadınları haldan-hala salan üç rəqəm
19 Dekabr 2013 18:32 (UTC+04:00)
Müasir gözəllik formulu "90-60-90"-nın televiziya
kanallarında, jurnallarda, internet saytlarında təbliği qadınların
bu formula uyğun gəlməyə çalışması ilə nəticələnir. Qadınlar müasir
gözəllik standartlarına çatmaq üçün arıqladan həblər içir,
uzunmüddətli pəhrizlər saxlayır, əməliyyatlara və sağlamlığa ziyan
vuran başqa prosedurlara üz tuturlar.
Psixoloq Arzu
Qurbanovanın sözlərinə görə, müxtəlif
dövrlərdə gözəlliyə olan tələblər fərqli olub: "Məsələn, əvvəllər
xüsusilə də, Şərq ölkələrində bir qədər köklük gözəllik hesab
olunurdu. Eləcə də ağ dəri, balaca ağız gözəllik rəmzi sayılırdı.
Hətta balaca ağıza "püstə" deyirdilər. İndi isə gözəllik
standartları dəyişib. Arıq, hündür və iri dodaqlı xanımlar gözəl
hesab olunurlar" deyən A.Qurbanova bildirir ki, indi qaralmaq da
dəb halını alıb. Onun dediyinə görə, bununla yanaşı gözəllik xeyli
süniləşib. Belə ki, modellərin müxtəlif proqramlarla düzəldilən
fotolarına oxşamaq istəyən xanımlar təbii yolla buna nail ola
bilmədikdə müxtəlif prosedurlar vasitəsilə süni gözəlliyə sahib
olurlar. Lakin bunun çox vaxt ağır fəsadları
olur.
Psixoloq əlavə edib ki, gözəllik standartları indi
insanlara daha çox təsir edir: "Reklamların təsiri altında qadınlar
kökəlməkdən qorxurlar. Qadınlarda arıqlamaq istəyi o qədər güclü
olur ki, hədsiz dərəcədə arıqlayırlar. Bəzi belə qadınlar müalicəsi
çox çətin olan anoreksiya xəstəliyinə tutulurlar. Belə ki, hədsiz
arıqlıq, qarının çuxura düşməsi, üzdə almacıq sümüklərinin üzə
çıxması, solğun dəri, xroniki aclığın təsirindən parıldayan gözlər
dəb halını alıb. Bu cür standartlara uyğun gəlmək isə fiziki
cəhətdən xüsusilə də, artıq çəkili xanımlara çox
çətindir".
Müsahibimiz bildirib ki, arıqlaya bilmədiyi üçün
əziyyət çəkən qadınlar oxşamaq istədikləri modellərin və
aktrisaların məşhur stilistlər, saç ustaları, vizajistlər və şəxsi
həkimlərlə işlədiyini nəzərə almalıdırlar. Hər gün onların
çəkilərinə və xarici görünüşünə nəzarət olunur. Bəziləri yanlış
olaraq düşünür ki, jurnalda gördükləri gözəl xanımlar yalnız pəhriz
salatları ilə qidalanırlar. "Əslində isə bu, belə deyil. Onlar da
qazlı və şirin sular içir, cəld yeməklə qidalanır və istədiyi
şeyləri yeyirlər. Sadəcə, onlarla işləyən heyət vacib çəkilişlər və
mərasimlərdən qabaq onlara xüsusi və qaydalarına ciddi riayət
olunan pəhriz tərtib edirlər. Bu pəhrizlər də tez bir zamanda bədən
quruluşunu lazımi formaya salır. Bu haqda saytlarda və jurnallarda
da kifayət qədər məlumatlar verilir. Misal üçün, məşhur ulduzlar
Ancelina Colinin, Keyt Uinsletin, Meqan Foksun, Monika Belluçinin,
Beyonsun, Natali Portmanın pəhrizləri və arıqlamaq üsulları barədə
kifayət qədər məlumatlar yayılıb".
Bəzi qadınlar artıq çəkili olduğu üçün o qədər
fikir edirlər ki, onlar həyatlarında baş verən bütün uğursuzluqları
köklüyü ilə bağlayırlar. Onlar arıq olsalar, uğurlu olacaqlarını
sanırlar. Hesab edirlər ki, arıq olsalar, əks cinsin nümayəndələri
daha çox onlara diqqət yetirəcək, iş sahəsində də nailiyyətlər əldə
edəcəklər. Öz xarici görünüşlərini bəyənmədikləri üçün qəribə
davranır, tez-tez depressiyaya düşürlər. Belə qadınlarda özünə inam
hissi itir. Onlara gözəl göründüklərini desən belə, buna
inanmırlar. Onlara elə gəlir ki, ətrafdakılar onlara gülür və
onları ələ salırlar.
A.Qurbanovanın dediyinə görə, bu cür
komplekslərdən qurtulmaq üçün ətrafdakı arıq xanımları müşahidə
etmək lazımdır. Həmsöhbətimiz məsləhət görür ki, gözəl xanımları
müşahidə etdikdə onların da problemlərinin, uğursuzluqlarının
olduğunu görəcəksiz: "Eləcə də həyatda uğur qazanan, şəxsi
həyatları qaydasında olanları da müşahidə edin. Onların hamısı
yaraşıqlı və arıqdırmı? Əgər bu cür müşahidələri aparsanız, onda
xarici görünüşün heç bir rol oynamadığını görəcəksiniz. Kifayət
qədər həyat yoldaşı tərəfindən sevilən, uşaqları olan, karyerasında
da uğur qazanan kök qadınlar var. Ola bilsin ki, onlar arıqlara
nisbətən daha xoşbəxtdirlər. Arıqlamaq istəyi ilə yaşayan və daim
öz xarici görünüşündən narazı olan qadınlar güzgüyə baxaraq öz
çatışmazlıqlarını görür və gün ərzində bunun fikrini çəkirlər. Belə
qadınların əhvalı çox pis olur, xüsusilə də uzun müddət ac
qaldıqları üçün əhəmiyyətsiz şeylərə görə də əsəbiləşirlər. Öz
xarici görünüşünü bəyənən xanım isə gülərüz və mehriban olur.
Əhvalı yaxşı olduğu üçün yaxınlarının qayğısına qalır, işdə də
fikri öz görünüşündə deyil, işində olur. Bu səbəbdən də artıq
çəkidən əziyyət çəkən və ya sadəcə hədsiz arıq ola bilməyənlər öz
xarici görünüşləri ilə harmoniyada yaşamağı öyrənməlidirlər. Əgər
özlərinə heç cür inanmırlarsa, görünüşülərində hansısa müsbət
cəhəti tapmağa çalışmalıdırlar. Məsələn, onun gözəl yaşıl gözləri
və ya dolğun dodaqları ola bilər və s. Öz görünüşündəki müsbət
cəhətləri tapıb qabartmaq, çatışmazlıqları isə gizlətmək
məsləhətdir. Belə ki, artıq kiloqrammlar düzgün geyinmədikdə çox
nəzərə çarpa bilər. Daha da zərif görünmək üçün qara və tünd
rənglərdən də istifadə etmək olar".
Dietoloq Günel
Məhərrəmova bildirib ki, insanın
çəkisinin normada olması Bədən Kütləsinin İndeksi (BKİ) ilə
yoxlanılır: "Sizə uyğun gələn ideal çəkini öyrənmək üçün insanın
boyu və yaşı nəzərə alınmalıdır. Boyu (metrlə) kvadrata yüksəltmək,
yəni boyu (metrlə) özünə vurmaq, sonra çəkini (kiloqramla) alınmış
nəticəyə bölmək lazımdır. Ümumdünya Səhiyyə Təşkilatının məruzəsinə
əsasən BKİ qadınlarda 21-ə, kişilərdə isə 23-ə bərabər olduqda çəki
optimaldır, BKİ 19-la 25 arasında olduqda bədən çəkisi normaldır.
BKİ 25-dən çox olduqda artıq çəki, 30-dan çox olduqda isə artıq
piylənmədir. Lakin BKİ 25-lə 29 arasında olduqda, köklüyün səbəbi
müəyyən olunmalıdır. Ola bilsin ki, köklük piylənmə deyil (məsələn,
idmançılarda), yaxşı inkişaf etmiş əzələ kütləsidir".