Məcburi köçkünlər üçün yeni qəsəbə salınır
15 Yanvar 2014 19:35 (UTC+04:00)
Ömrünün son 20 ili əzablar içində keçsə də, yaşı 60-ı haqlayan
Cəmilə xalanın müsahibə boyu üzündən gülüş əskik olmur. Uşaq
yaşlarında valideynlərini itirib. Qürbətdə olduğu üçün yeganə
qardaşının üzünü 30 ildir görməyib. 35 il əvvəl Tərtərdən Ağdamın
Şurabad kəndinə gəlin köçəndə 20 yaşı olub. 3 övladı var. 1-ci
Qarabağ müharibəsində Doğma yurdunu tərk edərək bir müddət
qohumlarının yanında yaşayıb. 15 ildən artıqdır Tərtərin Mamırlı
kəndi ərazisində Bərdə-Ağdam magistral yolunun kənarında humanitar
təşkilatların köməyi ilə inşa etdiyi palçıq daxmada yaşayır.
Məcburi köçkün Cəmilə Babayeva: "Uşaq da, dayanmadı orda. Kərpici
uşaqlar özləri kəsdi, daşı, şiferi özləri verdi, tikdirməyi də
özümüz tikdirdik, fəhləsi də, ustası da özümüz olduq".
Aradan keçən illlər ərzində oğlunun və özünün günəmuzd işlərdən
qazandığıyla otaqların sayını artırıb. Odun sobasıyla qızdırılan,
döşəməsi torpaqdan, tavanı çadırdan, divarları palçıqdan olan
daxmanı Cəmilə xala isti yuvaya çevirib. Bu palçıq daxmada 3 övlad
böyüdüb. Buradan oğullarını orduya yola salıb, qızını gəlin
köçürüb. Hazırda bu daxmada 3 nəvəsi böyüyür. Ən böyükləri Xəyalın
4 yaşı var. Ancaq yəqin ki, onlar palçıq daxmada keçirdikləri bu
günləri xatırlamayacaq. Çünki bir neçə aydan sonra ailə Ağdamda
məcburi köçkünlər üçün inşa edilən qəsəbəyə yerləşdiriləcək.
Qaçqın və Məcburi Köçkünlərlə İş Üzrə Dövlət Komitəsinin
sifarişiylə tikintisinə 2 ay əvvəl başlanan qəsəbə İmamqulubəyli
kəndi ərazisində inşa edilir. 632 evlik qəsəbədə məktəb, uşaq
baxçası, poçt ,klub, həkim məntəqəsi də inşa olunur. Ailələrin hər
biri 6 sot həyətyanı sahə ilə təmin ediləcək. Hər evə su çəkilir.
Su təminatının daimi olması üçün qəsəbədə 2 ədəd min kubmetrlik su
anbarı da inşa olunur. Artıq evlərin bir hissəsinin tikintisi başa
çatıb. Qəsəbə bu ilin yayında təhvil veriləcək və buraya
Bərdə-Ağdam magistral yolunun kənarında yaşayan ailələr
köçürüləcək. Beləliklə Cəmilə xalanın da əzablı günləri 6 ay sonra
başa çatacaq.