ABŞ İranı Musəvi və Kərrubini azadlığa buraxmağa çağırıb
15 Fevral 2014 20:25 (UTC+04:00)
ABŞ Dövlət Departamenti İran müxalifətinin liderləri sayılan
Mirhüsey Musəvi, onun həyat yoldaşı Zəhra Rəhnəvərd və Mehdi
Kərrubinin ev dustaqlığında saxlanılmasının üçüncü ildönümü ilə
bağlı bəyanat yayıb.
Movqe.az-ın "Radiofərda"ya istinadən verdiyi məlumata görə, sənəddə
həmin şəxslərin 2009-cu ildə keçirilmiş prezident seçkilərinin
nəticələrinə etiraz etdiklərinə görə həbs olunmasının dünya
ictimaiyyətinin narazılığına gətirib çıxardığı, onların ailələrinə
təzyiqlər göstərildiyi vurğulanıb, İran hökumətindən bu "vicdan
məhbusları"nı azadlığa buraxmaq istənilib. Bəyanatda həmçinin
bildirilib ki, İran Konstitusiyası, qanunlar və beynəlxalq
öhdəliklər tutulmuş şəxsin ən azı ədalətli mühakiməsi üçün ölkə
vətəndaşlarına zəmanət verir: "Ancaq özbaşına həbslər buna xələl
vurur". ABŞ Dövlət Departamenti İranı bir daha üzərinə götürdüyü
öhdəlikləri yerinə yetirməyə və bütün "vicdan məhbusları"nı
azadlığa buraxmağa çağırıb. Qeyd edək ki, Almaniya hökuməti və
"Amnesty İnternational" (Beynəlxalq Əfv Təşkilatı) da İrandan hər
üç şəxsi sərbəst buraxmağı tələb edib. Xatırladaq ki, İran
müxalifətinin liderlərindən olan Mirhüseyn Musəvi və onun həyat
yoldaşı Zəhra Rəhnəvərd ev dustaqlığında, M.Kərrubi İran
İnformasiya, Təhlükəsizlik və Kəşfiyyat Nazirliyinə (ETTELAT)
məxsus xüsusi təcrid evlərindən birində saxlanılırdı. Ancaq bu
günlərdə M.Kərrubi Tehran şəhərinin Çəmran məntəqəsindəki evinə
köçürülüb və mənzilinin birinci mərtəbəsində mühafizə dəstəsi
yerləşdirilib. Ona yalnız yerli telekanallara baxmaq icazəsi
verilib. M.Kərrubi peyk televiziyalarına baxa, internet və
telefondan istifadə edə bilməz. İranın baş prokuroru Qulamhüseyn
Möhsüni Ejei jurnalistlərə açıqlamasında deyib ki, M.Musəvi və
M.Kərrubi tövbə etməyəcəkləri təqdirdə onların işində heç bir
irəliləyiş baş verməyəcək.