Belarus Dövlət Akademik Musiqili Teatrında Fikrət Əmirovun “1001 gecə” baletinin premyerası olub
17 Fevral 2014 21:29 (UTC+04:00)
Fevralın 14-dən 16-dək Belarus Dövlət Akademik Musiqili Teatrında
Fikrət Əmirovun "1001 gecə" baletinin premyerası olub. Dirijor
Əyyub Quliyevin APA-ya verdiyi məlumata görə, baletin premyerası
Mədəniyyət və Turizm Nazirliyinin və Azərbaycan Dövlət Opera və
Balet Teatrının dəstəyi ilə baş tutub. Tamaşanın premyerasında
mədəniyyət və turizm nazirinin müavini Sevda Məmmədəliyeva, Belarus
Mədəniyyət Nazirliyinin rəhbərliyi, Azərbaycanın Belarusdakı səfiri
İsfəndiyar Vahabzadə və başqaları iştirak ediblər. Əyyub Quliyevin
rəhbərlik etdiyi baletin quruluşçusu Azərbaycanın xalq artisti
Mədinə Əliyeva, quruluşçu-rəssamı İnarə Aslanovadır. Tamaşanın
aparıcı partiyalarında Belarus Dövlət Akademik Musiqili Teatrının
solistləri çıxış ediblər. Qeyd edək ki, 2010-cu ildə Belarus Dövlət
Musiqili Teatrında Üzeyir Hacıbəylinin "Arşın mal alan"
operettasının, 2013-cü ildə isə Belarus Respublikası Dövlət Opera
və Balet Teatrının səhnəsində Qara Qarayevin "Yeddi gözəl"
baletinin premyerası olub.