Azərbaycan Milli Məclisi “İnformasiya əldə etmək haqqında” qanuna dəyişiklikləri qəbul edib
12 İyun 2012 20:52 (UTC+04:00)
Milli Məclisin növbədənkənar
iclasında "Hüquqi şəxslərin dövlət qeydiyyatı və dövlət reyestri
haqqında" qanuna dəyişikliklər məsələsi müzakirə olunub.
APA-nın xəbərinə görə, təklif
edilən dəyişikliyə əsasən, kommersiya hüquqi şəxslərin təsisçiləri
(iştirakçıları) və onların nizamnamə kapitalındakı payları barədə
məlumatlar konfidensial saxlanılacaq.
Layihə ilə kommersiya hüquqi şəxslərin təsisçiləri (iştirakçıları)
və onların nizamnamə kapitalındakı payları barədə məlumatlar bəzi
hallarda sorğu əsasında açıqlana bilər. Belə ki, həmin məlumatlar
qanunla müəyyən edilmiş hallarda və qaydada məhkəmə, istintaq və
təhqiqat orqanlarına, qanunun müəyyən etdiyi hallarda
əməliyyat-axtarış fəaliyyətinin subyektlərinə, "Cinayət yolu ilə
əldə edilmiş pul vəsaitlərinin və ya digər əmlakın
leqallaşdırılmasına və terrorçuluğun maliyyələşdirilməsinə qarşı
mübarizə haqqında" qanunla müəyyən olunmuş hallarda və qaydada
maliyyə monitorinqi orqanlarına verilə bilər. Həmçinin, məcburi
icra orqanlarına, vəkilə, həmin kommersiya hüquqi şəxsin digər
təsisçilərinə və iştirakçılarına, barəsində dövlət reyestrindən
məlumatların verilməsi tələb olunan şəxsin razılığı ilə üçüncü
şəxslərə də bu məlumatların açıqlanmasına icazə veriləcək.
Kommersiya hüquqi şəxslərin təsisçiləri (iştirakçıları) və onların
nizamnamə kapitalındakı payları barədə məlumatlar istisna olmaqla,
hər bir şəxs dövlət reyestrindəki yazılarla tanış olmaq, dövlət
reyestrindən çıxarışı və qeydiyyat üçün təqdim olunmuş sənədlərin
surətlərini tələb etmək hüququna malikdir.
Paralel olaraq Vergi Məcəlləsi və "Kommersiya sirri haqqında" qanun
layihəsi də müzakirə edilib. Həmin layihələrdə də müvafiq
dəyişikliklər nəzərdə tutulub.
Həmçinin, "İnformasiya əldə etmək haqqında" qanuna dəyişikliklər də
müzakirə olunub.
Qanuna təklif olunan dəyişikliklərə görə informasiyanın əldə
olunmasına o şərtlə icazə verilir ki, bu, Azərbaycan
Respublikasının siyasi, iqtisadi və hərbi sahələrdə milli
maraqlarının, maliyyə-kredit və valyuta siyasəti sahələrində
mənafelərinin qorunması, ictimai qaydanın, sağlamlığın və
mənəviyyatın qorunması, digər şəxslərin hüquq və azadlıqlarının,
kommersiya və digər iqtisadi maraqlarının qorunması, məhkəmənin
nüfuzunun və qərəzsizliyinin təmin edilməsi məqsədlərinə zidd
olmasın.
BAXCP sədri Qüdrət Həsənquliyev deyib ki, kommersiya sirləri ilə
bağlı dəyişiklik layihəsi jurnalistlərin araşdırma aparıb yazı
yazmaq imkanları məhdudlaşdırılır. O, təklif edilən dəyişikliyin
əleyhinə olduğunu söyləyib: "Onsuz da bədxahlarımız çoxdur. Biz
belə bir dəyişikliklə qarayaxma üçün həmin bədxahlara daha çox
şərait yaradırıq".
Spiker Oqtay Əsədov isə Q. Həsənquliyevin dedikləri ilə
razılaşmayıb: "Kim deyib ki, bu qanun layihəsi jurnalistlərə
qarşıdır? Bu, harada yazılıb?"
DİP sədri Asim Mollazadə də təklif olunan dəyişikliyin əleyhinə
olub: "Düşünürəm ki, mövcud şəffaflığı pozmaq olmaz".
YAP icra katibinin müavini Mübariz Qurbanlı isə təklif edilən
dəyişikliyin lehinə olduğunu söyləyib. O deyib ki, əslində təklif
edilən dəyişikliklər sahibkarları mediada şantaj olunmaqdan
qoruyacaq: "Bu, məntiqi bir addımdır".
Ümid Partiyasının sədri İqbal Ağazadə isə deyib ki, təklif edilən
dəyişiklikdə nəzərdə tutulan məqamlar əslində kommersiya sirri
sayıla bilməz: "Dünyanın heç yerində şirkətin payçısı, onun sahibi
cəmiyyətdən gizlədilmir".
MM sədrinin müavini Valeh Ələsgərov isə iradlarla razılaşmayıb:
"Əslində, bu dəyişiklik indiyədək mövcud olan qeyri-müəyyənliyi
aradan götürür".
BQP sədri Fazil Mustafa təklif edilən dəyişikliyin şəffaflığa qarşı
olduğunu söyləyib.
Sonda hər dörd layihə səsverməyə çıxarılaraq qəbul olunub.