239 nəfəri ölümə aparan təyyarənin qalıqları hələ ki, tapılmayıb
9 Mart 2014 12:01 (UTC+04:00)
Malayziyada ötən gün qəzaya uğrayan "Malayziyan Eyrlaynz" şirkətinə
məxsus sərnişin təyyarəsinin qalıqlarına rast gəlmək hələ ki,
mümkün olmayıb.
Malayziya rəsmiləri axtarış əməliyyatlarının bu gün erkən
saatlarından yenidən başladıldığını bildiriblər. Vyetnam
sahillərində dənizin üzərində rast gəlinən sarı ləkə təyyarənin bu
əraziyə düşməsi ehtimalını yaradıb.
Axtarış əməliyyatçıları ləkənin yanacaq ləkəsi olduğunu güman
edirlər.
Qəza zamanı "Boinq-777" tipli təyyarənin göyərtəsində 227 sərnişin,
12 ekipaj üzvü olub. Ttəyyarə ilə əlaqə sonuncu dəfə Vyetnam
ərazisindən uçarkən qeydə alınıb. Təyyarədə əksəriyyəti Çindən
olmaqla 14 ölkənin vətəndaşları var.
Radarlardan itən təyyarə Malayziyanın paytaxtı Kuala-Lumpurdan
Çinin paytaxtı Pekinə uçurmuş.