Jirinovski Qarabağ probleminin "həllini" tapdı
13 Mart 2014 20:00 (UTC+04:00)
Rusiya Liberal Demokrat Partiyasının sədri
Vladimir Jirinovski Dağlıq Qarabağ probleminin həlli yollarını
göstərib. ANS PRESS-in məlumatına görə, LDPR sədri heç vaxt
tərəflərin bu problemlə bağlı razılığa gələ bilməyəcəyini deyib.
"Buna görə də ən yaxşı yol onu da Rusiyanın tərkibinə qatmaqdır.
Onda ermənilər də, azərbaycanlılar da inciməyəcək. Qarabağın
Ermənistanda deyil, Rusiyanın tərkibində qalması ilə vəziyyətlə
barışmalı olacaqlar". Jrinovski bu sözləri "Rusiya xəbər xidməti"nə
müsahibəsində deyib.
Rusiyalı siyasətçi Dnestryanı problemində eyni
yolla həllini təklif edib.
"Cənubi və Şimali Osetiya - bunlar bir xalqdır.
Onlarında Şimali Osetiya ilə birləşib avtomatik olaraq Rusiyanın
tərkibinə daxil olmağa tam haqqları var. "Bütün keçmiş SSRİ ərazisi
referendum yolu ilə, könüllü, güc tətbiq etmədən, aldadılmadan
Rusiyanın tərkibinə qatıla bilər. hamınız Rusiyanın tərkibinə
qayıdın və hər şey yaxşı olacaq. Hamıya demokratiya, yaxşı şərait,
təhlükəsizlik və ili-ildən hər şeyin yaxşılaşacağı sözü
veririk".
Bu barədə qərarı kimin verə biləcəyi sualına
cavabında isə Jirinovski "biz istəyən hamını qəbul edəcəyik" deyə
cavab verib.
"Qoy burada ruslar, ukraynalılar, tatarlar,
azərbaycanlılar, ermənilər, istəyən hər kəs yaşasın. Onlar bizim
qonşularımızdır. Bu hamısı bizim keçmiş Rusiya imperiyası və Sovet
ittifaqının ərazisidir. Biz 300, 400, 500 ildir birlikdə
yaşayırıq".