Mahal İsmayıloğlunu Bakıda əməliyyat etmək istəmirlər
16 Mart 2014 13:15 (UTC+04:00)
"Türkiyəyə getməyə məcburam, amma
ona da maliyyə çatmır"
Ölkə mediasının tanınmış simalarından biri, "Xalq
qəzeti"nin sabiq baş redaktoru Mahal
İsmayıloğlunun vəziyyəti kritikdir.
Jurnalist təcili böyrək əməliyyatı keçirməlidir. Əməliyyat martın
17-nə təyin edilsə də, son anda həkimlər imtina
ediblər.
Bu barədə musavat.com-a M.İsmayıloğlu özü məlumat
verib. "Mərkəzi Neftçilər Xəstəxanasının Urologiya şöbəsi ilə bir
həftə ərzində danışıqlar aparılmışdı, əməliyyat razılaşdırılmışdı.
Oradan bildirilmişdi ki, martın 15-də əməliyyat üçün hazırlıq
olacaq və xəstəxanaya getməliyəm. Getdim, bəzi analizlər
götürdülər. Sonra qəfildən dedilər ki, həyat riski çox böyük
olduğuna görə sizi əməliyyat etməkdən imtina edirik. Buna görə
xəstəxanadan çıxdım, hazırda evdəyəm".
O qeyd edib ki, əməliyyat üçün Türkiyəyə getməyə
məcburdur, ancaq buna da maliyyə vəsaiti çatışmır: "Əməliyyatın
riskli olduğunu rəsmi şəkildə mənə bildirdilər. Türkiyədə isə
əməliyyat üçün 20 min manat civarında pul tələb olunur. Ancaq pul
yoxdur".
Qeyd edək ki, bir müddət əvvəl onun sağlıq
durumunda ciddi problemlər baş qaldırıb. Həkimlər onda ürək və
böyrək çatışmazlığı təsbit ediblər. Onun sözlərinə görə, böyrəyinin
biri tamam fəaliyyətini dayandırıb, digəri də fəaliyyətini
dayandırmaq üzrədir. Əməliyyat edilərək onun böyrəyinin biri təcili
götürülməlidir. Onun səhhətində bir neçə il öncə də ciddi
problemlər yaranmış və xəstəxanada müalicə almışdı, həmçinin ürək
əməliyyatı keçirmişdi.