Elektron vergi ilə bağlı qaydalar dəyişdirildi
31 Mart 2014 12:25 (UTC+04:00)
Azərbaycanda elektron vergi hesab-fakturalarının
tətbiqi, uçotu və istifadə qaydaları dəyişib. Movqe.az-ın
məlumatına görə, Azərbaycan Respublikası Nazirlər Kabineti
"Elektron vergi hesab-fakturalarının tətbiqi, uçotu və istifadə
Qaydaları"nda dəyişikliklər edilməsi barədə qərar qəbul
edib. Məlumatda bildirilir ki, indiyə
qədər vergi ödəyiciləri onlara vergi orqanı tərəfindən verilmiş
istifadəçi kodu, parol və şifrədən istifadə etməklə İnternet Vergi
İdarəsinə daxil olaraq elektron vergi hesab-fakturasını hazırlayıb,
təsdiq edib və təqdim ediblər. Yeni
dəyişikliklərə əsasən, satıcı elektron vergi hesab-fakturasını
Nazirlər Kabinetinin 2007-ci il 27 iyul tarixli 120 nömrəli qərarı
ilə təsdiq edilmiş "Vergi hesabatının elektron sənəd formasında
göndərilməsi Qaydaları"na əsasən vergi orqanından alınmış
istifadəçi kodu, parol və şifrə, yaxud "Elektron imza və elektron
sənəd haqqında" gücləndirilmiş elektron imza vasitəsilə Azərbaycan
Respublikası Vergilər Nazirliyinin rəsmi internet səhifəsi olan
İnternet Vergi İdarəsinə (www.e-taxes.gov.az) daxil olaraq
hazırlayır. Elektron vergi
hesab-fakturasının tərtib edilməsi, ləğv edilməsi,
dəqiqləşdirilməsi, əvəzləşdirilən elektron vergi hesab-fakturaları
barədə məlumatların sistemə daxil edilməsi üzrə əməliyyatların
həyata keçirilməsi qaydaları Azərbaycan Respublikası Vergilər
Nazirliyinin kollegiyası tərəfindən təsdiq edilmiş inzibati
reqlamentlə müəyyən edilir. Vergi ödəyicisi olan fiziki şəxsin özü
və ya hüquqi şəxsin rəhbəri hazırlanmış elektron vergi
hesab-fakturasının təsdiq edilərək göndərilməsini həyata keçirə
bilərlər. Elektron vergi
hesab-fakturasının ödəniş sənədlərini təsdiq etməyə səlahiyyəti
olan digər şəxs (şəxslər) tərəfindən həyata keçirilməsinə icazənin
verilməsi İnternet Vergi İdarəsində yaradılmış "Səlahiyyətlərin
idarə edilməsi" menyusundan istifadə edilməklə, gücləndirilmiş
elektron imza vasitəsilə təsdiq edilir.