Mərdəkan qəsəbəsində gecə baş verən hadisə az qala
bütün qəsəbə sakinlərinin həyəcanına səbəb
olub. Belə ki, keçi su quyusuna düşüb.
Heyvanı xilas etmək üçün dərhal əraziyə Fövqəladə Hallar
Nazirliyinin xüsusi xilasediciləri
çağırılıb. Məhz öz şıltaqlığı
ilə xırda buynuzlu heyvanlar içərisində seçilən keçi bu dəfə sahibi
üçün problem yaradıb. Paytaxtın Xəzər rayonu Mərdəkan qəsəbəsində
qeydə alınan bu hadisədə keçi, otlamaq əvəzinə su quyusuna düşüb.
Qəsbənin bağlar masivində vətəndaşa məxsus həyət evindəki quyuya
düşən keçini ilk əvvəl elə ev sahibi özü çıxarmağa çalışıb. Lakin
bunun üçün lazımi avadanlığının olmaması onu, Fövqəladə Hallar
Nazirliyinin (FHN) 112 qaynar xətt xidmətinə müraciət etməsinə sövq
edib. Hadisə yerinə nazirliyin
Xüsusi Riskli Xilasetmə Xidmətinin Suraxanı rayonu üzrə
xilasedicilər qrupu cəlb olunub. Ərazidə əməliyyat şəraiti
qiymətləndirilərkən məlum olub ki, keçi fərdi yaşayış evinin
həyatyanı sahəsindəki dərinliyi 33 metr, eni 1,5 metr olan su
quyusuna düşüb. Xilasetmə işlərinin çətinliyi nəzərə alınaraq
xüsusi alpinist avadanlıqlarından istifadəyə ehtiyac yaranıb.
Nazirlik əməkdaşları bu avadanlıqlar vasitəsilə quyuya enərək
heyvanı oradan çıxarmağa müvəffəq olublar. Daha sonra keçi sahibinə təhvil verilib.