İlham Əliyev yeni yolda maşın sürdü - Fotolar+ Video
8 Aprel 2014 11:20 (UTC+04:00)
Azərbaycan Respublikasının Prezidenti İlham Əliyev
Naxçıvan-Şahbuz-Batabat magistral avtomobil yolunun açılışında
iştirak edib.
Teleqraf.com xəbər verir ki, son illərdə Naxçıvanda yol-nəqliyyat
infrastrukturunun müasirləşdirilməsi istiqamətində həyata keçirilən
mühüm layihələr sırasında öz yeri olan Naxçıvan-Şahbuz-Batabat
avtomobil yolu ilk növbədə əhalinin sosial şəraitinin
yaxşılaşdırılması istiqamətində görülən işlərdəndi. Yüksək
səviyyədə inşa edilən bu yol nəqliyyatın rahat və maneəsiz
hərəkətinə tam zəmin yaradır.
Dövlət başçısı əvvəlcə yolun texniki-iqtisadi göstəricilərini əks
etdirən stendlərə baxıb.
Naxçıvan Muxtar Respublikası Ali Məclisinin Sədri Vasif Talıbov
Prezident İlham Əliyevə məlumat verib ki, ümumi uzunluğu 88,8
kilometr olan yolda tikinti işləri keyfiyyətlə aparılmış, iki il
müddətində başa çatdırılıb. Müasir tələblər səviyyəsində qurulan
yolda nəqliyyatın təhlükəsiz hərəkəti təmin edilib.
Prezidentin 2013-cü il 5 mart tarixli Sərəncamı ilə Babək rayonunun
13 yaşayış məntəqəsini əhatə edən 25,6 kilometr uzunluğunda
Hacıvar-Vayxır-Sirab yolunun tikintisinə 6,3 milyon manat vəsait
ayrılmışdır. Həmin vəsait hesabına yolun tikintisi başa
çatdırılıb.
İlham Əliyev yolun rəmzi açılışını bildirən lenti kəsib və yeni
yolda avtomobil idarə edib.