Maliyyə amnistiyasından hələ xəbər yoxdur

Cari ilin fevralında vergilər naziri Fazil Məmmədovun maliyyə amnistiyası ilə bağlı səsləndirdiyi fikirlər cəmiyyətdə geniş rezonans doğurdu. Həmin vaxt nazirqeyd edirdi: "Azərbaycanda maliyyə amnistiyası ilə bağlı xüsusi qərar layihəsi hazırlanır". Onun sözlərinə görə, bu böyük layihədir və Azərbaycan buna hazırdır: "Bu bir neçə ili əhatə edən layihə olacaq. Burada söhbət gəlirlər haqda bəyannamə sisteminə keçid prosesi çərçivəsində qeyri-qanuni, vergidən yayınma yolu ilə əldə edilmiş və gizlədilmiş əmlakın, həmçinin gəlirlərinin leqallaşdırılmasından gedir". Fazil Məmmədov deyib ki, amnistiya olmadan ümumi bəyannamə sisteminə keçmək olmaz: "İstər əmlak, istərsə də digər sərvətlərin leqallaşdırılması üçün müvafiq amnistiya sisteminə keçmək lazımdır. Bunun üçün digər prosedur məsələlər həll edilməlidir. Bütün hallarda bu qərar qəbul olunacaq. Hazırda bununla bağlı hazırlıq işləri gedir". 

Ekspertlər isə hesab edir ki, maliyyə amnistiyasını tezləşdirilməsinə ehtiyac var və bu, ölkə iqtisadiyyatı üçün də sərfəlidir. 

İqtisadçı-ekspert Vüqar Bayramov hesab edir ki, sözügedən qanun layihəsinin korrupsiyaya qarşı mübarizə tədbirlərinin genişləndirilməsində və ölkədə investisiya mühitinin gücləndirilməsində effektiv təsiri olacaqdır: "Ölkə iqtisadiyyatının bir çox sektorlarına, o cümlədən korrupsiyaya qarşı mübarizə tədbirlərinə effektiv təsiri olacaq bu qanun layihəsinin qəbul olunması tərəfdarıyam.  Bu, birmənalı şəkildə Azərbaycanın investisiya mühitini yaxşılaşdırmaqla daxili investisiya qoyuluşunun və ölkəyə gələn investisiya qoyuluşlarının artmasına gətirib çıxaracaq. O baxımdan qanunun qəbulu ölkə iqtisadiyyatının inkişafı baxımından birmənalı olaraq məqsədəuyğun addım olardı. Lakin nəzərə almaq lazımdır ki, Azərbaycanda maliyyə amnistiyası haqda qanunun qəbul olunması üçün kompleks şəkildə görüləcək işlərə ehtiyac var.  Bu, sadəcə qanunun qəbul edilməsi və onun icra edilməsi ilə bitmir. Ölkədə həmin qanunun qəbulu ilə bağlı işlərin gücləndirilməsinə ehtiyac var ki, onlardan biri də korrupsiyaya qarşı mübarizə tədbirlərinin gücləndirilməsi üçün vahid planın qəbuludur". 

Parlamentin İqtisadi Siyasət Komitəsinin üzvü Əli Məsimli isə Movqe.az-a bildirib ki, qanun layihəsinin qəbulu hələ ki, Milli Məclisdə müzakirə olunmur: "Maliyyə amnistiyası haqda qanunun qəbul edilməsi haqda bir müddət əvvəl Vergilər Nazirliyi tərəfindən təkliflər irəli sürüldü. Mən də dəfələrlə həm Milli Məclisdə, həm də mətbuatda bu məsələni qaldırmışam. Lakin hələ sözügedən qanun layihəsi Milli Məclisdə müzakirə olunmur. Belə olan təqdirdə onun qəbulundan söhbət gedə bilməz".