Azərbaycanda QİÇS-li xəstənin etirafları
10 Aprel 2014 20:12 (UTC+04:00)
Hazırda bəşəriyyətin mübarizə apardığı
xəstəliklərdən biri də QİÇS-dir. Uzun-uzadı tədqiqatlar aparılsa da
bu xəstəliyin hələ də müalicəsini tapmaq mümkün olmayıb.
Azərbaycanda da bu xəstəliyin daşıyıcıları var. Xüsusilə də cənub
bölgəsində QİÇS-li xəstələrin sayında artım
var.
Cənub bölgəsində QİÇS-ə yoluxan şəxs söylədi ki,
Rusiyaya gedəndə orada düşdüyüm mühit məni narkomaniyaya gətirib
çıxarıb. Ondan sonra da, QİÇS-ə yoluxdum. Hazırda bunun əzabını
çəkirəm. Amma çox təəəsüflər olsun ki, geriyə dönə bilmirəm.
Əvvəlki həyatımı yaşaya bilmirəm.
Əvvəlki sağlam həyatına qayıtmaq təkcə
qəhrəmanımızın deyil, bölgədə bu xəstəliyin daşıyıcısı olan 731
QİÇS-li xəstənin arzusudur. Elə təkcə ötən il 111 yeni yoluxma
faktının aşkarlanması, bu ilin 1-ci rübündə 4 nəfərin dünyasını
dəyişməsi QİÇS-in regionda əsl sosial bəlaya çevrilməsindən xəbər
verir.
Statistik rəqəmlərə görə, QİÇS-ə yoluxma və ölüm
halları cənub bölgəsinin bütün rayonlarında artıb. Ən böyük artım
isə Astara rayonundadır. Hər on min nəfərə bölgə üzrə artım 8,4
nəfərdirsə, Astara rayonunda bu rəqəm 2 dəfədən də artıqdır - 18,4
nəfər.
Respublika QİÇS-lə Mübarizə Mərkəzinin Lənkaran
regional labaratoriyasının müdiri Rəmiəli İbişov bölgədə xəstəliyin
belə sürətlə yayılmasına səbəbinə aydınlıq gətirib: "İlk illərdə
venadaxili narkoqəbuledicilik olub. Sonra Rusiya ilə əlaqələri
olub. Rusiyanın müxtəlif şəhərlərində yoluxmuşlar olub. Eyni
zamanda xarici ölkələrdə yoluxanlar. İndi isə özümüzdə o qədər
infeksiya mənbələri var, öz daxilimizdə də yoluxmalar
var".
Yoluxmalar isə hər il onlarla günahsız qurban üçün
həyat kabusuna çevrilir. Yoluxanlar arasında uşaqların sayı
açıqlanmasa da, 157 qadın olduğu bildirilir. Ümumiyyətlə isə
xəstəlik daşıyıcılarının əksəriyyətinin 25-40 yaş arasında olması
və təkcə Lənkəranda 73 nəfərin bu xəstəlikdən dünyasını dəyişməsi
gələcək genefondumuza böyük zərbədir.