“Azərbaycanın turist soraq kitabçası” fransızların ixtiyarına verildi
19 Aprel 2014 11:00 (UTC+04:00)
Fransanın www.petitfute.com internet portalında
Azərbaycanın turuzm imkanlarından bəhs olunan "Azərbaycanın turist
soraq kitabçası" başlıqlı məqalə dərc olunub.
Movqe.az Azertac-a istinadən xəbər verir ki ,
məqalədə Azərbaycanın İpək yolunun üzərində, şərqlə qərbin,
qədimiliklə müasirliyin arasındakı yerləşdiyi
bildirilib.
Qeyd olunub ki, Azərbaycanla bağlı fransız dilində
bələdçi kitabı elə tərtib olunub ki, bu ölkəyə səyahət edənlər heç
bir çətinlik çəkmədən onun tarixi, mədəniyyəti və mənəvi dəyərləri
ilə yaxından tanış olmaq imkanı əldə edə bilsinlər. Kitabçadakı 200
başlıq alıtnda verilən yazılarda ölkəmiz barədə hərtərəfli
məlumatlar yerləşdirilib.
"Azərbaycana xoş gəlmişsiniz" başlıqlı yazıda XlX
əsrin sonları və XX əsrin əvvəllərində neft sənayesinin inkişafı
sayəsində paytaxt Bakıda mühüm quruculuq işlərinin aparıldığı,
Avropa tipli yeni binaların inşa edildiyi haqda fransız oxucularına
ətraflı məlumat verilib.
Bakı şəhərinin Xəzər dənizinin sahilində
yerləşdiyini diqqətə çatdırılan məqalədə son dövrlərdə paytaxtda
müasir üslubda dünyada analoqu olmayan möhtəşəm binaların
tikildiyi, bərpa işlərindən sonra daha da yaraşıqlı olan
dənizkənarı bulvarın sakinlərin sevimli istirahət guşəsi olduğu,
müasir tipli çimərliklərdə turistlərin istirahəti üçün hər cür
şəraitin yaradıldığı, turizm imkanlarının genişləndiyi və ölkəmizlə
daha yaxından tanış olmaq üçün müxtəlif marşrutlar tərtib edildiyi
bildirilib.
Materialda Ermənistan-Azərbaycan, Dağlıq Qarabağ
münaqişəsi nəticəsində ərazilərimizin 20 faizinin erməni silahlı
qüvvələri tərəfindən işğal edildiyi, 1994-cü ildə atəşkəs barədə
razılıq əldə olunduğu, tarixi abidələrlə zəngin Naxçıvanın erməni
blokadasında olduğu qeyd edilib.
Fransız oxucularına, xüsusilə ölkəmizə səfər etmək
istəyən fransız turistlərinə dəniz və dağlar ölkəsi kimi təqdim
olunan Azərbaycanın ərazisi, dövlət quruluşu, əhalisinin sayı və
tərkibi, dövlət dili, dini etiqadı, pul vahidi, iqtisadiyyatı,
siyasəti, iqlim şəraiti, incəsənəti, muğam musiqisi, zəngin milli
mətbəxi, mehmanxanaları, tarixi abidələri barədə geniş məlumat
verilib.
Azərbaycanda ipəyin 4500 il bundan əvvəl istehsal
olunduğu diqqətə çatdırılan məqalədə xalçaçılıq, misgərlik və
dulusçuluq kimi sənətlərin də qədim dövrlərə təsadüf etdiyi,
şərabçılığın 7 min ildən artıq yaşı olduğu bildirilib, zərdüştlüyün
tarixindən bəhs olunub, Şəki, Gəncə, Quba, Lənkəran və digər
şəhərlərdən bəhs edilib.
Soraq kitabçası fransızların ölkəmiz haqqında
ətraflı məlumata malik olması və onların turust səfərləri etməsi
baxımından mühüm əhəmiyyət daşıyır.
Portalda ölkəmizin turizm imkanlarını əks etdirən
çoxsaylı şəkillər də yer alıb.
Materialın tam mətni ilə www.petitfute.com/p154-azerbaidjan/guide-touristique internet
resursunda tanış olmaq mümkündür.