BBQ Dağlıq Qarabağdakı vəziyyətdən təşvişə düşüb

23 İyun 2012 09:00 (UTC+04:00)

Bu yaxınlarda Azərbaycanla Ermənistan arasında bir necə hərbçinin ölümü ilə nəticələnən insidentlər BP və onun tərəfdaşlarının enerji layihələrinə 35 milyard dollar sərmayə qoyduğu regionda total müharibəyə çevrilə bilər. Bu barədə Beynəlxalq Böhran Qrupu (BBQ) məlumat yayıb. "Azərbaycan və Ermənistan tərəfindən cəbhə xəttində nəzarət zəifdir. Demək olar ki, heç bir beynəlxalq nəzarət həyata keçirilmir", - deyə qrupun Avropa proqramının rəhbəri Sabina Freyzer bildirib. O qeyd edib ki, tərəflərin cavab fəaliyyəti nəticəsində genişmiqyaslı hərbi əməliyyatlar yarana bilər. Onun sözlərinə görə, nə Azərbaycan, nə də ki, Ermənistan qısamüddətli perspektivdə total hərbi əməliyyatlar planlaşdırmırlar. "Əgər genişmiqyaslı hərbi əməliyyatlar bərpa edilərsə, bu uzunmüddətli müharibə olacaq. Belə ki, tərəflərdən heç biri o birinin üzərində böyük üstünlüyə malik deyil. Eləcə də, Rusiya və Türkiyənin də necə reaksiya verəcəyi bəlli deyil. Onlar təhlükəsizlik zəmanəti ilə bağlı verdikləri sözün üzərində ora daxil ola bilərlər". Freyzer bildirib ki, münaqişənin danışıqlar yolu ilə həll edilməsi perspektivi zəif görünür. Belə ki, hər iki tərəf - Azərbayan və Ermənistanda gələn il seçki olacaq. "İndi kompromisə getmək çətin olacaq. Hələlik onlar təhlükəsizliyin və etibarın möhkəmləndirilməsi haqqında əsaslarda razılaşa bilmirlər".