Elektron imza istifadəçiləri üçün tam təhlükəsiz E-şifrələyici proqramı
15 May 2014 16:07 (UTC+04:00)
Rabitə və Yüksək Texnologiyalar
Nazirliyinin Məlumat Hesablama Mərkəzi elektron xidmət sahəsində
yeni addım atıb. Movqe.az xəbər verir ki, Microsoftun (MS) Windows
əməliyyat sistemləri üçün nəzərdə tutulmuş yeni E-şifrələyici
proqram təminatı istifadəçilərə təqdim edili. Bu proqramın köməyilə
informasiyanın təhlükəsiz şəkildə mübadiləsi təmin
olunur.E-şifrələyici proqramı açıq açar kriptoqrafiyasına
əsaslanaraq hazırlanıb. Açıq açar kriptoqrafiyanın bir növü olan
asimmetrik şifrələmə əməliyyatından proqram yazılarkən istifadə
olunub. Asimmetrik şifrələmə prosesi zamanı açar cütündən : açıq
açar və gizli açar istifadə olunur. Bir-biri ilə bağlı olan açarlar
şəxsiyyətin kimliyini autentifikasiya etmək üçün yararlıdır. Açıq
açar vasitəsilə şifrələnən məlumat yalnız həmin açara bağlı olan
gizli açar vasitəsilə deşifrələnə bilər. Son zamanlar
informasiyanın təhlükəsiz şəkildə ötürülmə problemlərini nəzərə
alaraq yaradılan E-şifrələyici proqramı Milli Sertifikat Xidmətləri
Mərkəzinin elektron imza sertifikatı ilə imzalanmış sənədlərin
mubadiləsini təmin edir. E-şifrələyici proqramı informasiyanın iki
şəxs arasında təhlükəsiz mübadiləsi üçün istifadəyə verilib. Rahat
və funksional istifadəyə malik proqram MS Windows platformasında
istifadə üçün nəzərdə tutulub. E-şifrələyici proqramı Visual Studio
ortamında C# proqramlaşdırma dilində hazırlanıb. Microsoft .Net
Framework 3.5 və ondan daha yuxarı versiyaları dəstəkləyir.
Şifrələmə prosesi AES simmetrik şifrələmə və RSA asimmetrik
şifrələmə alqoritmlərindən istifadə ilə həyata keçirilir. İstifadə
üçün elektron-imza kartı, smart kart oxuyucu və internetə
məhdudiyyətsiz çıxış tələb olunur. E-şifrələyici proqramı elektron
imza kartı vasitəsilə açılır. İstənilən şəxsin sertifikatı
vasitəsilə şifrələnən imzalanmış sənədi, yalnız həmin şəxsin
elektron imza kartı vasitəsilə açmaq mümkündür. Bu bir daha üçüncü
şəxsin sənədə baxa bilməməsini və informasiyanın təhlükəsiz
mübadiləsini göstərir. Proqram və onun istifadə təlimatı www.e-imza.az saytında verilmişdir.