Artıq şəhərdə gəzəndə və ya ilk dəfə hansısa,
ünvana qonaq gedəndə yoldan keçənlərdən ünvan haqqında məlumat
almağınıza gərək olmayacaq.
Movqe.az ANS TV-ə istinadən xəbər verir ki,
2012-ci ildən başlayan müasir ünvan sisteminin tətbiqi və yeni
qaydalarla ünvan vermə işləri davam etdirilir. Artıq paytaxtın bir
çox küçə və prospektlərində yeni ünvan və məlumat lövhələri
qurulub. Şəhər sakinləri də bu addımı yüksək
qiymətləndirir.
Yeni sistemdə ünvan məlumatları daha təfərrüatlı
olacaq. Belə ki, hər bir girişdəki mənzillərin nömrələri ayrıca
göstəriləcək. Ünvan məlumatlarında mənzilin hansı mərtəbədə
yerləşməsi də əks olunacaq.
Yeni qaydalara əsasən, küçə və prospektlər
kodlaşdırılacaq. Yəni küçələrin adları ilə yanaşı, xüsusi kodları
da olacaq. Sənədlərdə də küçə və prospektin adı ilə yanaşı, onun
kodlaşmış nömrəsi də göstəriləcək. Küçənin adı dəyişəndə bu kod
dəyişməyəcək.
Yaxın gələcəkdə isə respublika üzrə naviqasiya
sisteminin qurulması nəzərdə tutulur.
Artıq yeni ünvan vermə qaydalarına uyğun olaraq,
Bakı şəhərinin 1325, Sumqayıt şəhərinin 69, Gəncə şəhərinin 684
küçə və prospektindəki daşınmaz əmlak obyektlərinə giriş ünvanları
təyin edilib.