Erməni kəşfiyyatından Azərbaycana yeni təxribat (VİDEO)

26 May 2014 00:00 (UTC+04:00)
Azərbaycanda etnik azlıqlar arasında separatçılıq meylləri yaymaq üçün çalışan Ermənistan xüsusi xidmət orqanlarının daha bir təxribatı məlum olub.

Movqe.az-ın Virtualaz.org-a istinadən məlumatına görə, mayın 24-də YouTube portalında "Ani Margaryan" adlı admin tərəfindən Azərbaycanın cənub və mərkəzi regionlarından ibarət "Şirvan fars respublikası"nın "himni" adı altında videorolik yerləşdirilib. 

Ermənistan xüsusi xidmət orqanlarına bağlı olan və Azərbaycana qarşı durmadan düşmən təbliğatı aparan animargaryan.org saytının iddiasına görə, həmin "himni" internetdə "Şirvan Azadlıq Cəbhəsi"nin Abşeron özəyinin A.A. adlı "təmsilçisi" yerləşdirib. Həmin "təmsilçi" sayta müsahibə də verib.

Xatırladaq ki, Azərbaycanda "Şirvan Azadlıq Cənhəsi" adlı gizli təşkilatın yarandığı haqda ilk dəfə bu ilin martında İrəvan Dövlət Universiteti şərqşünaslıq fakültəsinin dosenti Vardan Voskanyan danışmışdı.

Ötən ilin payızında bədnam separatçı Ələkrəm Hümbətovun Ermənistana və işğal altındakı Dağlıq Qarabağa səfərini təşkil edən V.Voskanyan bildirmişdi ki, bu günlərdə Azərbaycanda "Qafqaz farsları-tatlar" tərəfindən "Şirvan Azadlıq Cəbhəsi" adlı təşkilat yaradılıb.

"Bu təşkilat gizli fəaliyyət göstərəcək. Onun məqsədi Azərbaycan ərazisində Şirvan fars dövlətinin yaradılmasıdır" - deyə Voskanyan əlavə etmişdi.

Həmin vaxt sosial şəbəkələrdə "Şirvan Azadlıq Cəbhəsi"nin emblemi və bəyanatı da yerləşdirilmişdi. Mayın 16-17-də İrəvanda keçirilən konfransda yenidən bu barədə danışılıb.

Bəs Azərbaycanda Ermənistan xüsusi xidmət orqanlarının dəstəyi ilə doğrudanmı "Şirvan Azadlıq Cəbhəsi" adlı gizli separatçı təşkilat yaradılıb və bu təşkilatın adından YouTube portalında "fars dövləti"nin "himnini" yerləşdirən kimdir?

Şübhəsiz ki, əgər belə gizli təşkilat doğrudan da yaranıbsa, Azərbaycan xüsusi xidmət orqanları onu izləyir və fəaliyyətini nəzarət altında saxlayır. O cümlədən internetdə həmin "himnin" kim tərəfindən yerləşdirildiyini müəyyən etmək də Azərbaycan xüsusi xidmət orqanları üçün çətin deyil.