Qadın alverinin yeni marşurutu: Hindistan
12 İyun 2014 11:30 (UTC+04:00)
Azərbaycandan qadınların Dubaya axın etməsi bir
zamanlar ən aktual mövzu olsa da, sonradan bu məsələ arxa plana
keçdi. İllərdən bəri formalaşmış fikir isə bu gün ən ağır təhqir
formasına qədər gəlib çatıb. Amma son bir neçə ildə qadın alverinin
marşurutunun dəyişməsi kimsənin diqqətini çəkməyib.
JAM.AZ-ın araşdırmalarına görə, son illər Azərbaycandan Dubaya
gedən yüngül əxlaqlı qadınların sayı xeyli azalıb. Bu Birləşmiş
Ərəb Əminliklərində (BƏƏ) onların "bazarı"nın zəifləməsi və onların
yerini Ukrayna və Rusiyadan gələn qızların tutması ilə izah edilir.
Gələn məlumatlarda vurğulanır ki, bir zamanlar "dominant" olan
azərbaycanlı qızların Dubayda "mövqeləri"ni itirməsini görən qadın
alverçiləri çox keçmədən yeni "bazar"
aşkarlayırlar. Həmin araşdırmalara görə, son illər
Azərbaycandan Hindistana gedənlərin sayı xeyli artıb. Onların
əsasən iki məqsədlə bu ölkəyə üz tutması isə təsdiqlənmiş
məlumatlardandır. Birinci kateqoriyaya aid olan kontingentin
nümayəndələri əsasən qızıl və qiymətli daşların ticarəti ilə məşğul
olanlardır. Azərbaycan bazarında Hindistan qızılı və brilliantları
son iki ildə üstünlük təşkil edir. Həmin ucuz, həm də gəlirli sahə
olan bu işlərin izinə düşənlərin sayı xeyli azdır.
İkinci kateqoriyanın nümayəndələri isə "qədim peşə sahibləri"dir
ki, onlar bu "bazarı" iki ilə yaxındır kəşf ediblər. Hindistanda 1
milyarddan artıq insanın yaşadığını düşündükdə, Azərbaycandan
qızların bu ölkəyə niyə əxlaqsızlıq üçün getdikləri sualı yaranır.
Maraqlı məqam odur ki, qeyd edilən ölkədə fahişəlik heç də asan
məsələ sayılmır və buna ciddi qınaq var. Amma kənardan gələnlərlə
belə əlaqələrin qurulması çoxlarının diqqətini çəkmədiyindən həmin
qınaqdan kənarda qalmaq olur. Ona görə də, müxtəlif ölkələrdən
Hindistana gəlmiş qızların Dehli, Mumbay və digər şəhərlərin
otellərində rahatlıqla "bazarlıq" predmeti ola
bilirlər.