Hakerlər ildə 445 milyard dollar qazanır
21 İyun 2014 11:00 (UTC+04:00)
Dünya iqtisadiyyatı kiber cinayətkarlığa görə hər
il 445 milyard dollar itirir.
Movqe.az ANS PRESS-ə istinadən xəbər verir ki,
"Center for Strategic and International Studies" Beynəlxalq
Araşdırmalar (CSIS) Mərkəzinin əməkdaşları kiber cinayətkarlar
tərəfindən dünya iqtisadiyyatına vurulan zərəri ildə 445 milyard
dollar məbləğində qiymətləndiriblər.
Bununla yanaşı, əqli mülkiyyət obyektlərinin
oğurlanması nəticəsində biznes sahəsi təxminən 160 milyard dollar
itirir.
Bu haqda "Reuters" agentliyi "McAfee" antivirus
firmasının dəstəyi ilə keçirilmiş tədqiqat məlumatlarına istinadla
məlumat yayıb. Hakerlərin qanunsuz fəaliyyətindən ən çox ABŞ, Çin,
Yaponiya və Almaniya zərər görür. Bu ölkələrin iqtisadiyyatı hər il
ümumilikdə təxminən 200 milyard dollar itirir. İnkişaf etməkdə olan
ölkələrə dəyən zərər isə hələ ki azdır.
Tədqiqatlara görə, dünyanın internet iqtisadiyyatı
ildə 2-3 trilyon dollar generasiya edir. Bu gəlirin təxminən 15-20
faizini kiber cinayətkarlar götürürlər. Yalnız fərdi informasiyanın
ələ keçirilməsindən dəymiş zərər 150 milyard dollar dəyərində
qiymətləndirilir. Təxminən 40 milyon amerikalı ələ keçirilmiş
məlumatların "qurbanı" olub. Türkiyədə bu göstərici 54 milyon,
Almaniyada 16 milyon, Çində 20 milyondan çoxdur.
"IDC" analitiklərinin qiymətləndirməsinə görə,
2014-cü ildə dünya şirkətləri qeyri-leqal proqram təminatında
boşluqların aradan qaldırılmasına 127 milyard dollar
xərcləyəcəkdir. Daha 364 milyard dollar korporativ informasiya
sızması ilə mübarizəyə sərf olunacaqdır.