Türk liseylərinin şagirdlərinə 6 min yer ayrılıb
1 İyul 2014 18:44 (UTC+04:00)
Azərbaycan Beynəlxalq Təhsil Kompleksinin ümumi
təhsil müəssisələrində təhsil alan şagirdlərin Bakının ümumi təhsil
müəssisələrində yerləşdirilməsi ilə bağlı valideynlərin qəbuluna
başlanıb. Bakı şəhəri üzrə Təhsil
İdarəsinin mətbuat xidmətinin rəhbəri Arzu Tairquliyeva
Movqe.az-a bildirib ki, təmsil etdiyi idarə şagirdlərə Bakıda
fəaliyyət göstərən dövlət ümumtəhsil müəssisələrində 6 min yer
təqdim edib. Onun sözlərinə görə,
Azərbaycanda 11 lisey var ki, onlardan 3-ü Bakıdadır. Azərbaycan
Beynəlxalq Təhsil Kompleksinin ümumi təhsil müəssisələrində təhsil
alan şagirdlərin sayı ölkə üzrə 3730 nəfər, Bakı şəhəri üzrə 1600
nəfərdir. "Bundan başqa valideynlər
övladlarının ümumi təhsil müəssisələrində yerləşdirilməsi ilə bağlı
Bakı şəhəri üzrə Təhsil İdarəsinə, və ya istədikləri məktəblərə
müraciət edə bilər", deyə Arzu Tairquliyeva bildirib.
Onun sözlərinə görə, valideynlərin
Bakı şəhəri üzrə Təhsil İdarəsinə müraciəti şagirdlərin məktəblərə
yerləşdirilməsi prosesi tamamilə başa çatana qədər davam
edəcək.