Mübarək Ramazan ayı başlayandan xurmanın qiyməti bahalaşmaqla yanaşı keyfiyyəti də aşağı düşüb. İftar süfrəsi üçün ərzaq mağazalarından alınan xurmaların içərisindən qurd çıxır. Bütün dünyada müsəlmanların mütləq əksəriyyətinin orucunu açdıqları bu cənnət meyvəsinin keyfiyyətindən şikayətlənənlərin sayı demək olar ki, günü-gündən artır. Alıcılar mağazalarda satılan xurmaların çoxunun qurdlu və köhnə olmasından şikayətlənirlər. İstehlakçıların dediyinə görə, xurma qutularının üzərində istehsal tarixi və son istifadə müddətinin göstərilməməsi onların xurmanın təzə, yaxud köhnə olduğunu dəqiqləşdirmək imkanını məhdudlaşdırır. Çəki ilə satılan xurmaların da keyfiyyətində problem var. Xurmalar açıq şəkildə satılsa da, köhnə olduğundan onların çoxunun içərisi qurdlu olur. Yaxudda xurmaların içərisində qurdun yumurtaları, sürfələr çıxır. Mağazalarda apardığımız müşahidələr də alıcıların haqlı olduğunu təsdiqlədi. Binəqədi rayonu ərazisində yerləşən ərzaq dükanlarında satılan xurma qutularının heç birinin üzərində istehsal və son istifadə tarixləri qeyd olunmamışdı. Bu ərazidə yerləşən marketlərdə satıcılarla söhbətləşib xurma qutularının üzərində tarixin qeyd olunmamasının səbəbi ilə maraqlansaq da, onlar bu işdə topdansatış məntəqələrini günahkar gördülər. Bildirdilər ki, ərzaq dükanlarına əksər mallar, həmçinin xurma topdansatış məntəqələrindən gətirilir. Mağazaların qutuların üzərinə tarix qoymaq səlahiyyəti yoxdur. Azad İstehlakçılar Birliyinin (AİB) sədri Eyyub Hüseynov isə əlacın əhalinin xurma almaqdan imtina etməsinə qaldığını söyləyir. Birlik sədri deyir ki, problemdən birinci çıxış yolu ərzaq dükanlarına nəzarəti gücləndirməkdir. Amma bu iş lazımi səviyyədə yerinə yetirilmirsə, o zaman əlac alıcıların xurma almaqdan imtina etməsinə qalır.