Azərbaycandakı dini təxribata rəsmi aydınlıq gəldi
5 İyul 2014 17:00 (UTC+04:00)
Daxili İşlər Nazirliyinin (DİN) Mətbuat Xidmətinin rəis müavini
Ehsan Zahidov dünən Sabirabad şəhərində bir nəfərin saqqalının
kənar şəxslər tərəfindən qırxılması barədə bəzi xəbər portallarında
yayılmış xəbərə aydınlıq gətirib.
Movqe.az xəbər verir ki , Ehsan Zahidov bildirib ki, iyunun 4-də
Sabirabad şəhər mərkəzi bazarının yaxınlığında Kürdəmir rayon
sakini Cavanşir Zərbəliyevin qeyri-ənənəvi dini təriqətlərdən
birinin təbliğatını aparması ətrafdakı vətəndaşların etirazına
səbəb olub: "Bu zəmində şəhər sakini Rəmzi Zeynalovla Cavanşir
Zərbəliyev arasında əlbəyaxa davaya keçən münaqişə baş verib. Rəmzi
Cavanşirin saqqalından tutaraq ondan insanların etirazına səbəb
olan söhbətinə son qoymasını və dərhal ərazini tərk etməsini tələb
edib. Bu barədə məlumat alan polis əməkdaşları dərhal hadisə yerinə
gələrək hər iki şəxsi saxlayaraq Rayon Polis Şöbəsinə gətiriblər.
Onların ərizə və izahatları alınıb, baş vermiş hadisə ilə bağlı
təhqiqata başlanılıb".
DİN rəsmisi deyib ki, araşdırmaların nəticəsindən asılı olaraq
qanuni qərar qəbul ediləcək.
Qeyd edək ki, saqqalı qırxılan C.Zərbəliyevin vəhhabi dini
təriqətinə mənsub olduğu və Sabirabad sakini olmadığı
bildirilir.
"Yeri gəlmişkən, onu da xüsusi olaraq vurğulamaq istərdim ki, heç
kimin özbaşına olaraq kimsəni cəzalandırmaq, mühakimə etmək hüququ
yoxdur. Bütün məsələlər yalnız qanun çərçivəsində öz həllini
tapmalıdır. Konkret olaraq baş vermiş bu münaqişədə də deyilənlər
sübut olunarsa, günahkar qanunla müəyyən edilmiş qaydada öz
cəzasını alacaqdır", - deyə Ehsan Zahidov bildirib.