"Hazırda pəhriz çörəkləri ilə bağlı ən böyük problemi dietik çörəklərin tərkibinə şəkərin qatılmasındadır". Bu sözləri Movqe.az-a açıqlamasında Respublika Endokrinoloji Mərkəzinin həkim-endokrinoloqu, Azərbaycan Diabet Liqasının sədri Yeganə Sultanova söyləyib. Onun sözlərinə görə, qara pəhriz çörəkləri diabetli xəstələrə tərkibində nişasta az olduğundan və şəkər olmaması səbəbindən məsləhət görülür: "Qara çörəyin tərkibində olan B1 vitamini maddələr mübadiləsini sürətləndirir, şəkərin qanda toplanmasının qarşısını alır. Ona görə də şəkər xəstələrinə qara pəhriz çörəyi məsləhət görülür. Əgər bu gün qara çörəklərə şəkər qatılırsa, bu o deməkdir ki, diabetli xəstə həmin çörəkdən normadan artıq istifadə etdiyi halda qanda şəkərin miqdarı qalxacaq. Nəzərə almaq lazımdır ki, 1 dilim çörək, 1 vahid inisulin deməkdir. Belə çörəklərin şəkər xəstələrinə satılması düzgün deyil".
Y. Sultanova bildirib ki, hazırda tərkibində şəkər olan məhsullar həm apteklərdə, həmçinin də mağazalarda şəkər xəstələri üçün hazırlanmış məhsullarla birgə, eyni vitrində satılır. Hansıki, artıq həmin məhsulların üzərindən şəkər xəstələrinin istifadəsi üçün nəzərdə tutulduğunu əks etdirən qeyd götürülüb: "Bir müddət əvvəl Azərbaycana gətirilən "Sladkiy saxar"adlı məhsulun arxasında şəkər xəstələri üçün tövsiyyə olunduğu əks etdirən qeyd öz əksini tapmışdı. Artıq Rusiyada bu məhsulun arxasından bu qeyd yığışdırılıb. Çünki, bu qəndin tərkibində şəkər var. Qəndin 100 qramında 99,6 qram şəkər olsa da, bu məhsul hazırda Azərbaycanda şəkərli diabet xəstələri üçün hazırlanmış məhsullarla eyni vitrində satılır. Bu isə şəkər xəstələri üçün çox təhlükəlidir. Çünki, sözügedən qənd çörəkdən də artıq və sürətlə qanda şəkərin miqdarını artırır. Bu qəndin ikin tikəsi qanda şəkərin miqdarını 36 milli qram artırır. Buna baxmayaraq şəkər xəstələri üçün hazırlanmış məhsullarla eyni vitrinə qoyularaq şəkər xəstələrinə satılır. Halbuki, artıq bu məhsulun arxasından şəkər xəstələrinin istifadəsinə göstərişi əks etdirən qeyd də çıxardılıb".
Zülfiyyə Quluyeva