Bu gün Azərbaycan Mətbuat Şurasında tanınmış publisist, filologiya üzrə fəlsəfə doktoru, "Təfəkkür" Universitetinin jurnalistika kafedrasının professoru Tofiq Yusifovun "Açıq cəmiyyət və mətbuat" kitabının təqdimatı keçirilib.
Tədbiri giriş sözü ilə açan MŞ sədri Əflatun Amaşov bildirib ki, kitabda başlıca olaraq açıq cəmiyyət anlayışının mahiyyəti, onun yaranma tarixi, bir formasiya olmaq etibarı ilə formalaşması və mətbuatın müasir mərhələdə bu prosesə fəal təsirindən bəhs edilir. Hazırkı dövrdə məhz jurnalistika sahəsindəki nümunələrin azlığından danışan Ə.Amaşov nəşri dəyərli elmi vəsait kimi də xarakterizə edib.
Bakı Dövlət Universitetinin jurnalistika fakultəsinin professoru Nəsir Əhmədli çıxışında əsasən müəllifin fərdi keyfiyyətləri üzərində dayanaraq bunun yaradıcılıqla çulğalaşmasının gözəl sənət nümunəsinin formalaşmasına səbəb olduğunu vurğulayıb.
Cəmiyyətin özünü ifadə etmək imkanlarının çoxalacağı təqdirdə belə kitabların daha çox ərsəyə gələcəyini vurğulayan BDU-nun dekanı, professor Şamil Vəliyev nəşri təkcə mətbuat deyil, ümumilikdə ictimai-siyasi fikir, mədəniyyət tarixi barədə ortaya qoyulmuş peşəkarlıq nümunəsi kimi dəyərləndirib.
MŞ İdarə Heyətinin üzvü, "İki sahil" qəzetinin baş redaktoru Vüqar Rəhimzadə mətbuat günü ərəfəsində belə bir nəşrin işıq üzü görməsini jurnalistikamız üçün böyük bayram hədiyyəsi adlandırıb. O, müəllifin "Açıq cəmiyyət və mətbuat" kitabı ilə bütövlükdə Azərbaycan jurnalistikasının inkişafı ilə bağlı fundamental baxış ortaya qoyduğunu vurğulayıb.
MŞ İdarə Heyətinin üzvü, "Paralel" qəzetinin baş redaktoru Tapdıq Abbas bildirib ki, təqdimatı keçirilən nəşrin ən mühüm xüsusiyyətlərindən biri orada Azərbaycanda açıq cəmiyyətin formalaşması prosesində mətbuatın həlledici rolunun qabardılması, bu missiyanın dolğun misallarla sübuta yetirilməsidir.
Çıxış edənlərdən "Assa irada" İnformasiya Agentliyinin və "Azərnyus" qəzetinin rəhbəri Fazil Abbasov, veteran jurnalistlər Məzahir Süleymanzadə, Altay Zahidov, həmçinin "Xalq qəzeti"nin baş redaktor müavini Tahir Aydınoğlu, "Addım" qəzetinin baş redaktoru Anar Vəziroğlu və başqaları təqdimatı keçirilən nəşrdə Azərbaycan cəmiyyətinin totalitar rejimdən milli dövlətçilik quruculuğuna keçid dövründə medianın demokratiya və söz azadlığı, plüralizm və şəffaflıq, azadfikirlilik və insan haqlarının müdafiəsi sahəsində nəhəng fəaliyyət prinsiplərinin, təbliğatçılıq və təşviqatçılıq funksiyasının konkret fakt və misallar əsasında xronoloji araşdırılmasını müəllifin zəhmətsevərliyinin, peşəsinə hədsiz bağlılığının məhsulu kimi dəyərləndiriblər.
Sonda çıxış edən "Açıq cəmiyyət və mətbuat" kitabının müəllifi Tofiq Yusifov toplantı iştirakçılarına, nəşrin ərsəyə gəlməsində əməyi keçən hər kəsə təşəkkürünü bildirib.
Qeyd edək ki, "Apostrof" Çap Evi tərəfindən kütləvi tirajla buraxılmış 220 səhifəlik "Açıq cəmiyyət və mətbuat" kitabı KİV-in praktik jurnalistləri, eləcə də publisistikanın nəzəriyyəsi və təcrübəsi problemlərini araşdıran pedaqoqlar üçün nəzərdə tutulub.
Kitabda mətbuatın ölkədə gedən quruculuq proseslərinə təsiri, cəmiyyətin bu quruculuq səylərini dərindən qavraması və dəstəkləməsi, cəmiyyətlə dövlət arasında münasibətlərin sivil qaydada tənzimlənməsində onun yeri və rolu elmi və praktik şəkildə əsaslandırılıb. Müəyyən edilib ki, açıq cəmiyyətin yaranması və ideyalarının bütün dünyada rezonans doğurması, demokratik cəmiyyətlərin inkişafının ayrılmaz hissəsinə çevrilməsi ötən əsrdə reallaşsa da, bu proses KİV-in ictimai həyata fəal müdaxiləsi və onun rolunun, nüfuzunun getdikcə artması nəticəsində son 20 ildə daha populyar, qaçılmaz və aktual olub. Araşdırma dünya ölkələri mətbuatının açıq cəmiyyətin formalaşması istiqamətində fəaliyyət prinsiplərinin əsas məqamlarının öyrənilməsindən və Azərbaycan mətbuatının 1991-2004-cü illərdə sözügedən sahədə uğur və çətinliklərindən bəhs edir. Nəşrdə həmçinin ölkəmizin Avropaya, Qərbə inteqrasiya ilə bağlı strateji siyasəti kontekstindən demokratik, sivil dəyərlərin mətbuatda təbliği və KİV vasitəsi ilə toplumun açıq cəmiyyətin əsas prinsiplərindən olan debatlar sisteminə, aşkarlıq, şəffaflıq, xalqla hakimiyyətin dialoqu, fərdlərin və ayrı-ayrı ictimai qrupların dövlətin idarə olunması prosesində iştirakı və s. məsələlərə hazırlanmasına aydınlıq gətirilib.