Masallıda Rayon İcra Hakimiyyəti Başçısı RAFİL HÜSEYNOVUN səyyar qəbulu
11 Sentyabr 2014 12:38 (UTC+04:00)
Masallı Rayon İcra Hakimiyyətinin başçısı
Rafil Hüseynovun səyyar qəbulu bu dəfə Xırmandalı kənd orta
məktəbinin həyətində keçirildi.
Masallı Rayon İcra Hakimiyyəti aparatının məsulları, hüquq-mühafizə
orqanları və idarə - müəssisə rəhbərlərinin iştirak etdiyi geniş
şura iclası və səyyar qəbulu Rafil Hüseynov açdı. RİH başçısı dedi
ki, məqsədim problemlərinizi öyrənmək və təkliflərinizi
dinləməkdir. Sözçü bildirdi ki, Xırmandalı ziyalıları, ağsaqqal və
gəncləri burada iştirak edir. Ağsaqqal sözünə həmişə ehtiyac var.
Kənddə ağsaqqal sözünü, tövsiyələrini hamı eşitməlidir. Səmimi
söhbət etməliyik, son vaxtlar Xırmandalıda baş verən olaylar bizi
narahat edir. Burda hamı yaxınlardır. Qohum-qardaşdır. Kənd
tirələrə bölünəndə adamlar arasında münasibətdə soyuqluq
yaradır.
Rayon polis şöbəsinin rəisi, polkovnik Nəriman İmanov göstərdi ki,
cari ilin 8 ayı ərzində Xırmandalı sakinlərindən DİN-nin 102
xidmətinə müxtəlif zəmində şikayətlərlə bağlı 117 məlumat daxil
olub. Bunların bir hissəsi kənddə törədilmiş cinayətlər, əsas
hissəsi isə ailə-məişət zəminində baş vermiş münaqişələr, ictimai
yerlərdə sərxoş vəziyyətdə xırda xuliqanlıqlar, bəzi sakinlərin
qeyri-etik davranışları olmuşdur.
Bu ilin 8 ayında Xırmandalıda xəta törətdiyinə görə 10 nəfər
inzibati, 4 nəfəri ictimai yerlərdə xırda xuliqanlığa yol
verdiyinə, 6 nəfər isə döymə və sair zorakı hərəkətlərə görə
cinayət məsuliyyətinə cəlb edilmişdir.
Sonra Xırmandalı kənd inzibati ərazi dairəsi üzrə 2014-cü ilin ötən
dövründə ictimai asayişin qorunması, kriminogen vəziyyət, habelə
vətəndaşların hüquq və azadlıqlarının, qanuni mənafelərinin
qorunmasının təmin olunması haqqında rayon məhkəməsinin sədri Hilal
Xəlilov və rayon prokuroru Fikrət Əsgərov məruzə etdilər. Bu
mövzuda Xırmandalı ərazi nümayəndəsi Məhərrəm İbrahimov,
sakinlərdən Qulu Gözəlov, Rahim Abdullayev, Samı Hüseynov, Möhübbət
Qasımov, Gülsənəm İmanova, İşkanə Muradova, Əmirzadə Muradov da
təkliflər verib, problemlər barədə danışdılar.
Rayon icra hakimiyyəti başçısının birinci müavini Nadir Abıyev və
mərkəzi xəstəxananın baş həkimi Cəlil Nəzərov qeyd etdilər ki,
Xırmandalıda sözüötən, müdrik, ölkədə tanınan ağsaqqallar olub və
var. Kəndin zəhmət adamları Xırmandalını çörəkli kəndə
çevirmişdilər. Ənənə davam etdirilməli, torpaqdan səmərəli istifadə
edilməlidir.
RİH başçısı R.Hüseynov sakinlərə danışmağı, müraciətlər irəli
sürməyi təklif etdi. Sakinlərdən Elman Qurbanov, Eyvaz Zeynalov,
Mürsəl Hüseynov, Ənniyaz Həziyev, Nurəli Qasımov, Həsənbala
Abdullayev və başqaları kəndə qaz, yol çəkilişinə görə rayon
rəhbərinə minnətdarlıq etdilər.
Sakinlər səyyar qəbulda bir sıra şəxsi problemləri, bəzi məişət
qaydaları ilə əlaqədar RİHB-yə müraciət etdilər. Rayon rəhbəri
idarə müdirlərinin ünvanına qarşı səsləndirilən şikayət və
təkliflərlə bağlı dərhal tədbirlər görməyi və bu işlərin nəticəsi
haqqında məlumat verməyi tövsiyə etdi.
RİH başçısı R. Hüseynov görüşün səmərəli keçdiyini bildirib dedi
ki, təklif və müraciətlərinizin bəzilərinə elə buradaca aydınlıq
gətirildi. Ölkə Prezidentinin tapşırığına əsasən bu ucqar kənddə
çox işlər görmüşük. Yol çəkilib, həkim məntəqəsi tikilib, qaz
istifadəyə verilib. Gənclərin asudə vaxtı səmərəli təşkil
olunmalıdır. Kəndin gələcəyi onların əlindədir. Onlara tövsiyəm
budur ki, ağsaqqalları eşitsinlər, həyat yollarını öyrənsinlər.
Gələcəkdə də Xırmandalıya diqqəti artırmalıyıq.