Xarici İşlər Nazirliyi Ermənistanda
girov götürülən Şahbaz Quliyev və Dilqəm Əsgərov üzərində qondarma
məhkəmə işinin təşkil olunması xəbərinə münasibət bildirib.
Movqe.az xəbər verir ki, Xarici İşlər Nazirliyinin mətbuat
xidmətinin açıqlamasına bildirilir ki, qondarma Dağlıq Qarabağ
rejiminin Azərbaycan vətəndaşları üzərində məhkəmə işi təşkil
etməyə heç bir hüquqi əsası yoxdur:
`Ermənistan kütləvi informasiya vasitələrində Ermənistan tərəfindən
girov götürülmüş Şahbaz Quliyev və Dilqəm Əsgərov üzərində qondarma
məhkəmə işinin təşkil olunacağı haqqında məlumat verilmişdir.
Qondarma Dağlıq Qarabağ rejiminin Azərbaycan vətəndaşları üzərində
məhkəmə işi təşkil etməyə heç bir hüquqi əsası yoxdur və bu
qondarma məhkəmə tərəfindən qəbul ediləcək qərar heç bir hüquqi
gücə malik ola bilməz.
Öz doğmalarının qəbirlərini ziyarət edən Şahbaz Quliyev və Dilqəm
Əsgərov girov götürülmüş və uydurma istintaq prosesi çərçivəsində
işgəncələrə məruz qoyulmuş və Həsən Həsənov isə vəhşicəsinə
Ermənistan silahlı qüvvələri tərəfindən qətlə yetirilmişdir.
Ermənistanın bu kimi əməlləri beynəlxalq humanitar hüquq və Cenevrə
konvensiyalarının müddəaları ilə bilavasitə ziddiyyət təşkil
edir.
Azərbaycan Respublikasının ərazisində Azərbaycan Respublikası
vətəndaşlarının sərbəst hərəkətinə Azərbaycan Respublikasının
qanunlarında nəzərdə tutulmuş xüsusi hallar istisna olmaqla, heç
kim tərəfindən məhdudiyyət və ya qadağa qoyula bilməz.
Ermənistanın Azərbaycana qarşı işğal və təcavüz əməllərinin
ört-basdır edilməsi məqsədilə işğal olunmuş Azərbaycan ərazilərində
qondarma Dağlıq Qarabağ rejimi yaradılmışdır. Ermənistan
Azərbaycana qarşı işğal və təcavüz əməlləri ilə beynəlxalq hüququn
norma və prinsiplərini, BMT nizamnaməsini və Helsinki yekun aktını
kobud şəkildə pozmuş və buna görə bilavasitə məsuliyyət
daşıyır.
Azərbaycan Respublikası tərəfindən Şahbaz Quliyev və Dilqəm
Əsgərovun azad edilməsi üçün beynəlxalq təşkilatlar, ATƏT-in Minsk
Qrupunun həmsədrləri və Beynəlxalq Qızıl Xaç Komitəsi ilə iş davam
etdirilir`