Azərbaycan ilə İran arasında mədəniyyət sahəsində əməkdaşlıq məsələləri müzakirə edilib
10 Oktyabr 2014 18:43 (UTC+04:00)
Oktyabrın 10-da mədəniyyət və turizm naziri
Əbülfəs Qarayev İranın Radio və Televiziya Təşkilatının sədri
İzzətullah Zərğaminin başçılıq etdiyi nümayəndə heyəti ilə
görüşüb.
Movqe.az AzərTAc-a istinadən xəbər verir ki, görüşdə Əbülfəs
Qarayev Azərbaycan ilə İran arasında mədəniyyət və turizm
sahəsindəki mövcud əməkdaşlıq əlaqələrindən söz açıb, etibarlı
əməkdaşlıq mühitinin formalaşdırılması məsələlərinin vacibliyini
önə çəkib.
Ölkələrimiz arasında dostluq əlaqələrinin tarixi və ənənəvi köklərə
malik olduğunu diqqətə çatdıran mədəniyyət və turizm naziri
vurğulayıb ki, səfərlər və görüşlər, iki dövlət arasında
münasibətlərin genişlənməsinə və inkişafına xidmət edir.
Azərbaycan və İran xalqlarının tarixi dostluğunu xatırladan
İzzətullah Zərğami bu münasibətlərin son vaxtlar daha sürətlə
inkişaf etdiyini vurğulayıb, televiziya və radio yayımları
sahəsində də əməkdaşlığın genişləndirilməsinin zəruriliyini qeyd
edib. Qonaq bu yaxınlığın iki dövlət arasındakı münasibətlərin
dərinləşməsində olduqca mühüm rol oynadığını vurğulayıb.
Görüşdə ölkələr arasında mədəniyyət, turizm və mədəni irs sahəsində
əməkdaşlıq, bu əlaqələrin inkişaf etdirilməsi və digər məsələlər
barədə müzakirələr aparılıb.