Səfirin Qarabağ açıqlaması
22 Oktyabr 2014 20:26 (UTC+04:00)
Dağlıq Qarabağ münaqişəsinin sülh yolu ilə
həllindən başqa alternativi yoxdur.
ANS PRESS-in məlumatına görə, bunu diplomatik
missiyasının başa çatması münasibətilə keçirilən tədbirdə Fransanın
Ermənistandakı səfiri Anri Reno bildirib.
O, prezidentlər Fransua Oland, İlham Əliyev və
Serj Sarkisyanın qarşıdakı görüşü barədə danışıb və xatırladıb ki,
Ermənistan və Azərbaycan prezidentləri arasında növbəti görüş
barədə təşəbbüs Fransua Olland tərəfindən Bakıya, eləcə də İrəvana
bu ilin mayında reallaşdırdığı səfəri zamanı irəli sürülüb və qəbul
olunub. Görüş yaxın günlərdə Parisdə olacaq. Danışıqlarda hədəf
Dağlıq Qarabağ münaqişəsinin həlli yollarının axtarılıb tapılması,
yeni stimulverici məqamların yaranması olacaq. Tərəflər arasında
etibarlılıq atmosferinin yaradılması çox əhəmiyyətlidir ki, ümumi
vəziyyətin dəyişikliyi üçün yeni imkanlar
yaransın.
Səfir ATƏT-in Helsinki aktının prinsiplərini
xatırladıb, ölkələrin ərazi bütövlüyünə, xalqların hüquqlarının
qorunmasına hörmətlə yanaşmağın zəruriliyini, bölgədə sabitliyin
bərpasına ehtiyac olduğunu söyləyib.
O, qondarma DQR prezidenti Bako Saakyanın həmsədr
ölkələrin prezidentlərini Dağlıq Qarabağa səfərə dəvət etməsindən
xəbərsiz olduğunu vurğulayıb: "Mən bu təşəbbüsdən məlumatsızam.
Ümumiyyətlə, Dağlıq Qarabağ münaqişəsinin nizama salınması prosesi
ATƏT-in Minsk qrupunun formatına daxildir".