"E-hökumət"dən vətəndaşlara daha bir xidmət
3 Noyabr 2014 09:00 (UTC+04:00)
"Elektron hökumət" portalı üzərindən təqdim edilən xidmətlərin
istifadəsi ilə əlaqədar "Əks əlaqə" və "Müraciətlər" adlı xüsusi
bölmə hazırlanıb. Məlumat Hesablama Mərkəzindən verilən məlumata
görə, vətəndaşlar portalda "Müraciətlər" bölməsinə daxil olaraq
(həmçinin hər bir e-xidmət səhifəsində olan "Əks əlaqə" düyməsini
seçməklə) istənilən elektron xidmətlə bağlı müraciətləri portal
üzərindən xidmət təminatçısına ünvanlaya və verilən cavabları
izləyə biləcəklər. Sistemdə vətəndaş ilə xidmət təminatçısı
arasında passiv rejimdə dialoq aparılır və bütün yazışmalar
arxivləşdirilir. Yeni sistem vasitəsilə vətəndaşlardan daxil olan
müraciətlər, onların cavablandırılması barədə statistik məlumatlar
online rejimdə portalda qurumlar üzrə yerləşdiriləcək və aylıq
"Elektron hökumət" bülletenlərində dərc ediləcək.
Daxil olan müraciətləri cavablandıracaq məsul şəxslər barədə
məlumatlar dövlət qurumları tərəfindən Məlumat Hesablama Mərkəzinə
siyahı şəklində təqdim olunacaq və həmin şəxslər sistemdə
tanıtdırılacaq.