Ölkədə özəlklinikaların sayı günü-gündənartsa da, pullu tibb müəssisələrində təklif olunan xidmətlərin qiyməti ucuzlaşmaq bilmir. Bazar iqtisadiyyatı prinsiplərinə görə, təklif artdıqca rəqabət mühiti yaranmalı, qiymətlərdə fərq hiss olunmalıdır. Amma, nədənsə, Azərbaycanda özəl tib müəssisələri yağışdan çıxan göbələk kimi, günü-gündən artsa da, özəl klinikalarda qiymətdə tərpəniş olmur. Klinikalar isə bunu hərəsi özünəməxsus şəkildə izah edir. "Vital" Klinikasının baş həkimi Mehriban Rzayeva özəl xəstəxanalarda qiymətlərin müayinələr zamanı istifadə olunan materialların qiymətinə əsasən müəyyənləşdiyini bildirdi: "Əgər söhbət təkcə qan analizinin qiymətindən gedirsə, burada tarifi əsasən qanın yoxlanılması üçün istifadə "reaktiv"in qiyməti müəyyənləşdirir. Amma həmin məbləğə labarotoriyada çalışan işçilərin əmək haqqı və kommunal xidmətlərə çəkilən xərc də aiddir. Apartla müayinələrdə isə qiymət müəyyən olunarkən həmin cihazın alınmasına çəkilən xərc əsas götürülür. Aparat nə qədər bahalıdırsa, onunla müayinə üçün müəyyənləşdirilən qiymətlər də bir o qədər baha olur".
"Funda" TibbMərkəzindən isə bildirdilər ki, özəl klinikalarda tariflər tələb-təklif əsasında müəyyən edilir: "Düzdür, analiz və aparatla müayinələrin qiymətlərində bu xidmətin göstərilməsi üçün istifadə olunan materialların alış qiyməti əsas götürülür. Amma qiyməti artıran əsas səbəb tələbin-təklifi üstələməsidir. Əgər bu gün hər hansı bir özəl klinikada qan analizi və yaxud hər hansaı müayinə üçün insanlar növbə gözləyirsə, təbii ki, həmin yerdə qiymətlər baha olacaq. Özəl klinika öz gəlirini heç kəsin maraqlarına qurban vermir. Tələbatın çox olduğunu görüb qiyməti artırırlar. Bu gün özəl klinikalarda qiymətin baha olmasının elə birinci səbəbi tələbatın çox olmasıdır".
"Baku Medical Center"in marketinq şöbəsindən isə özəl xəstəxanalarda qiymətlərin bahalığının səbəbini belə izah etdilər: "Bu gün özəl xəstəxanaların müayinə aparmaq üçün aldıqları materiallar, reaktivlər çox baha qiymətədir. Ona görə də müayinələrin qiyməti baha olur".
Özəl xəstəxana səlahiyyətlilərindən fərqli olaraq, İqtisadi Tədqiqatlar Mərkəzinin idarə heyyətinin üzvü Dünya Camalova pullu xəstəxanalarda tariflərin baha olmasının başqa səbəblərlə bağlı olduğunu bildirdi. Onun sözlərinə görə, birinci səbəb özəl tibb müəssisələri arasında rəqabət mühitinin olmamasıdır: "Özəl klinikaların demək olar ki, hamısı dövlət tibb müəssisələrində həkimlərlə əlbir işləyirlər. Dövlət tibb ocaqlarındakı həkimlərin bir çoxu əməkdaşlıq etdikləri özəl xəstəxanalara öz xəstələrini göndərirlər. Bunun müqabilində isə həmin klinika həkimə xəstənin sayından asılı olaraq aylıq faiz ödəyir. Özəl xəstəxana müştəri qıtlığı yaşayacağından ehtiyatlanmır. Ona görə də göstərdiyi xidmətə istədiyi kimi tarif müəyyənləşdirir".
Həmsöhbətim digər səbəbin dövlət tibb müəssisələrinə inamsızlıqla bağlı olduğunu söylədi. D.Camalovanın sözlərinə dövlət tibb müəssisələrinin əksəriyyətində müayinə üçün müasir tibbi avadanlıqlar yoxdur. Bu səbəbdən insanlar özəl xəstəxanalarda pul ödəyərək müayinə olunmağa məcbur olurlar. Üstəlik özəl klinikalarda işləyən həkimlərin çoxu peşəkardır".
Amma D. Sakit bəzən əksinə vəziyyətin də müşahidə olunduğunu söyləyir. Həmsöhbətimiz deyir ki, bəzən yüksək məbləğə xidmət göstərən özəl tibb müəssisəsinin xidmətinin keyfiyyəti çox aşağı olur: "Əlbəttə ki, mən bütün özəl klinikalarda xidmətin yüksək səviyyədə, ordakı həkimlərin hamısının peşəkar bacarıqlı olduğunu da iddia etmirəm. Əksinə, bir çox hallarda özəl klinikalarda daha aşağı səviyyəli həkimlər, mütəxəssislər çalışır. Məsələn, bu yaxınlarda çox məşhur klinikaların birində mənim yaxın bir adamımı kompüter tomoqrafiyası etdilər. 6 il əvvəl öd kisəsi çıxarılan bu adama nəticədə yazmışdılar ki, "öd kisəsi izlənildi, ölçüləri filan-filan, divarları filan". Eyni hal başqa bir klinikada da olmuşdu. Dediyim odur ki, heç də bütün özəl xəstəxanalarda xidmət, peşəkarlıq yüksək səviyyədə deyil. Lakin göründüyü kimi, bütün bunlara rəğmən, klinikalarda qiymət çox yüksək olaraq qalır. Bu qiymətlər qonşu İrandan, hətta Türkiyənin ən tanınmış xəstəxanalarındakından da bahadır. Təsəvvür edin, adi bir UZİ müayinəsi 35-40 manatdan aşağı deyil".
Onun sözlərinə görə, özəl klinikalardakı belə bahalığın bir səbəbi sağlam rəqabət mühiritinin olmamasıdırsa, digər səbəbi də onların əksəriyyətinin yüksək vəzifəli şəxslərə bağlı olmasıdır: "Yəni klinika bilir ki, qiymət üzündən bir neçə xəstənin itirilməsi onun maliyyə durumuna təsir göstərməyəcək. Nə də xidmət keyfiyyətinə görə ona bir söz deyilməyəcək. Klinika xəstə cəlb etməkdə çətinlik çəkmir. Buna görə də qiymət endirməyə ehtiyacı olmur".
Səhiyyə Nazirliyinin mətbuat xidmətinin rəhbəri Anar Qədirli isə nazirliyin pullu klinikalarda olan qiymətlərə qarışmadığını söylədi: "Bazar iqtisadiyyatıdır, bazarda qiymətlər sahibkar tərəfindən tənzimlənir. Özəl tibb ocaqları öz daxili imkanaları hesabına qiymətləri tənzimləyir. Əlbəttə ki, bahaçılıqdır. Özəl tibb müəssələrinə üz tutan xəstələrin burda müalicə olunma istəyi onların şəxsi seçimidir. Bizim dövlət xəstəxanalarının əksəriyyətində yüksək səviyyədə tibbi xidmət göstərən pulsuz labortoryalarımız var. Ona görə də xəstələrin özəl xəstəxanalara üz tutması mütləq deyil. Amma yenə də seçim xəstələrindir".