Azərbaycanda ünvanlılıq prinsipi əsasında yoxsul ailələrdə körpə və erkən yaşlı uşaqlar üçün pulsuz uşaq qidası veriləcək. Movqe.az xəbər verir ki, "Azərbaycan Respublikasında əhali sakinliyi və demoqrafik inkişaf sahəsində Dövlət Proqramı (2014-2025-ci illər)"nda qeyd olunub ki, ünvanlılıq prinsipi əsasında yoxsul ailələrdə körpə və erkən yaşlı uşaqlar üçün pulsuz uşaq qidasının verilməsinin təmin edilməsi istiqamətində müvafiq tədbirlərin həyata keçirilməsi ilə bağlı işlər mütəmadi olaraq Nazirlər Kabineti, Əmək və Əhalinin Sosial Müdafiəsi Nazirliyi, Səhiyyə Nazirliyi, İqtisadiyyat və Sənaye Nazirliyi, Səhiyyə Nazirliyi, Ailə, Qadın və Uşaq Problemləri üzrə Dövlət Komitəsi tərəfindən icra olunacaq. Layihədə uşaqların ana südü ilə qidalandırılmasının əhəmiyyəti barədə ictimai maarifləndirmənin, uşaq qidasının istehsalı üzrə milli sənaye potensialının yaradılması ilə bağlı müvafiq tədbirlərin həyata keçirilməsi, uşaq təhsil-tərbiyə müəssisələrinə gedən uşaqların qidalanmasına, sağlamlığının möhkəmləndirilməsinə və xəstələnmə hallarının azaldılmasına yönəldilən tədbirlərin təşkilinə nəzarətin gücləndirilməsi, qida məhsullarının keyfiyyətinin yüksəldilməsi, suyun və havanın çirklənməsinin azaldılması, ətraf mühitin sağlamlaşdırılması sahəsində beynəlxalq və Avropa standartları əsasında (İSO, Codex Alimentarius, CEN) milli standartların hazırlanması və tətbiqi istiqamətində müvafiq tədbirlərin həyata keçirilməsi nəzərdə tutulub. Bundan əlavə, əhali, xüsusilə yeniyetmələr və gənclər arasında sağlam həyat tərzinin təbliği üzrə Tədbirlər Planının hazırlanması və həyata keçirilməsi, əhalinin sağlam həyat tərzi və özünü qoruma məsələləri ilə bağlı fasiləsiz təhsil və gigiyenik tərbiyələndirmənin təmin edilməsi üzrə müvafiq tədbirlərin həyata keçirilməsi, gənclər arasında alkoqolizm, narkomaniya və toksikomaniyanın profilaktikası məqsədilə mühazirələrin aparılması, sosial çarxların çəkilməsi, təhsil müəssisələrində xüsusi reydlərin keçirilməsi, uşaqların icbari dispanserizasiyası layihəsi çərçivəsində yuxarı sinif şagirdləri arasında tibbi testlərin aparılması proqramda əks olunub.