“Azərbaycanın baş nazirinin səhhəti ilə bağlı problem yoxdur və o iş başındadır”
25 İyul 2012 15:58 (UTC+04:00)
Bu açıqlamanı APA-ya Nazirlər Kabineti mətbuat
xidmətinin rəhbəri Akif Əli verib. A. Əli deyib ki, baş nazirinin
səhhəti ilə bağlı mətbuatda gedən məlumatlar həqiqəti əks etdirmir:
"Baş nazir illik məzuniyyət haqqının yalnız bir həftəsindən
istifadə edib. Bu müddət isə 9 iyul-16 iyul tarixlərinə təsadüf
edib. Həmin müddət ərzində baş nazirinin səlahiyyətlərini onun
birinci müavini Yaqub Eyyubov yerinə yetirib. Buna görə də müvafiq
olaraq Yaqub Eyyubov həm qərarları imzalayıb, həm də iyulun 16-da
Azərbaycanda səfərdə olan Monteneqro və Gürcüstanın baş nazirlərini
qəbul edib. Bu normal prosedurdur. İyulun 20-dən etibarən isə baş
nazir işə çıxır və hazırda da iş başındadır. Onun səhhətində xüsusi
bir geriləmə olmayıb və heç bir problem yoxdur".
A. Əli qeyd edib ki, baş nazirin səhhəti ilə bağlı mətbuatda
yazılanlar qeyri-peşəkarlığın nəticəsidir: "Baş nazir səhhəti ilə
əlaqədar heç bir problem yaşamır və o özünü kifayət qədər gümrah
hiss edir".