Ədliyyə Nazirliyi Penitensiar xidmətinin 2012-ci ilin birinci yarım ili ərzində fəaliyyətinin yekunlarına həsr olunan əməliyyat şurası keçirib. Bu barədə Modern.az-a Penitensiar xidmətin ictimaiyyətlə əlaqələr şöbəsindən məlumat verilib. Məlumatda bildirilib ki, şurada Penitensiar xidmətin rəhbərliyi, tabe qurumların müdiriyyəti, habelə Ədliyyə Nazirliyinin Cəzaların icrasına nəzarət üzrə müfəttişliyinin və Təşkilat-nəzarət idarəsinin məsul əməkdaşları iştirak ediblər.
İclasda ədliyyə nazirinin müavini, Penitensiar xidmətin rəisi
Mədət Quliyev Penitensiar xidmətin 2012-ci ilin 6 ayı ərzindəki
fəaliyyətindən danışıb və qeyd edib ki, məhkumların saxlanma
şəraitinin yaxşılaşdırılması, müasir beynəlxalq standartlara cavab
verən yeni penitensiar müəssisələrin inşası, penitensiar sistemdə
qanunçuluğun təmin edilməsi, nizam-intizamın möhkəmləndirilməsi,
tabe qurumların fəaliyyətinə nəzarətin gücləndirilməsi, habelə
nöqsanların aradan qaldırılması ilə bağlı müəyyən nəticələr əldə
edilib, habelə mövcud nöqsanların aradan qaldırılması üzrə
tədbirlər davam etdirilib.
Penitensiar xidmətin rəhbərliyi tərəfindən şəffaflığin
artırılmasına xüsusi fikir verilib, vəzifədən sui-istifadə,
korrupsiya halları ilə bağlı daxil olan ərizə və şikayətlər
nəzarətə götürülüb və hərtərəfli araşdırılıb. "Azərbaycan
ədliyyəsinin inkişafına dair 2009-2013-cü illər üçün Dövlər
Proqramı"nın icrası ilə əlaqədar tədbirlər davam etdirilir.
Penitensiar müəssisələrin əməliyyat aparatlarının respublikanın
hüquq-mühafizə orqanları ilə qarşılıqlı əməkdaşlığı nəticəsində 110
müxtəlif cinayətlərin üstü açılıb. Qadağan olunan əşyaların
cəzaçəkmə müəssisələrinə keçirilməsinin qarşısının alınması, habelə
narkotik maddələrin qanunsuz dövriyyəsi ilə mübarizə xüsusi diqqət
mərkəzində olub. Belə ki, 2012-ci ilin birinci yarım ili ərzində
Penitensiar müəssisələrdə keçirilən əməliyyat-baxış tədbirləri
nəticəsində 8730 manat pul, 39 litr spirtli içki, 101 mobil
telefon, 197,3 qram çəkidə müxtəlif narkotik vasitələr aşkar
edilərək götürülüb.
Şurada hesabat dövrü ərzində Penitensiar xidmətin 103 əməkdaşının
müxtəlif intizam məsuliyyətinə cəlb olunduğu, 9 əməkdaşın isə
ədliyyə orqanlarından xaric edildiyi bildirilib. Ədliyyə Nazirinin
və Penitensiar xidmət rəisinin müvafiq əmrləri ilə 9 və 17 saylı
saylı cəzaçəkmə müəssisələrinin rəisləri tutduqları vəzifədən azad
olunub, 14 saylı Məntəqə tipli cəzaçəkmə müəssisəsinin rəisinin isə
səlahiyyətlərinə xitam verilib və o ədliyyə orqanlarından xarıc
edilib.
Əməliyyat Şurasında məhkumların vaxtından əvvəl şərti azad
olunmaları və məntəqə tipli cəzaçəkmə müəssisələrinə keçirilməsi
praktikasının hazırkı vəziyyəti müzakirə edilib.
Əməliyyat Şurasına yekun vuran ədliyyə nazirinin müavini,
Penitensiar xidmətin rəisi Mədət Quliyev vurğulayıb ki, 2012-ci
ilin birinci yarım ili ərzində Penitensiar xidmət və onun tabe
qurumları tərəfindən qarşıda duran vəzifələr əsasən yerinə
yetirilib, müəyyən müsbət nəticələr əldə olunub. Bununla yanaşı
fəaliyyətdə mövcud olan nöqsan və pozuntuların aradan qaldırılması,
fəaliyyətin daha da təkmilləşdirilməsi üçün müvafiq tapşırıqlar
verilib.