“Avropa Birliyi mühüm tərəfdaşımız olan Azərbaycanın problemlərinə daha yaxından diqqət yetirməlidir”
10 Avqust 2012 11:11 (UTC+04:00)
"Azərbaycan energetika
məsələlərində iştirak edən əhəmiyyətli bir tərəfdir və Avropa
Birliyi üçün mühüm tərəfdaşdır". APA-nın məlumatına görə, bu bəyanatla
Avropa Birliyinin enerji məsələləri üzrə komissarı Günter H.
Öttinger çıxış edib. Avropa Azərbaycan Cəmiyyətindən APA-ya verilən məlumata görə, Azərbaycanla
bağlı bəyanat verən Öttinger bildirib ki, Avropa Birliyi
Azərbaycanla əməkdaşlığı möhkəm zəmin və birgə aydın maraqlar
üzərində qurub.
Onun fikrincə, Azərbaycanın Avropa Birliyinin "Şərq tərəfdaşlığı"
proqramında iştirakı tarixi bir mərhələdir: "Azərbaycan Cənub
dəhlizi adlandırılan bəyannaməni imzalamaqla enerji nəql
edilməsində mühüm rol oynadığını və öz fəaliyyəti ilə Avropa
Birliyinə daha da yaxınlaşdığını təsdiq etmiş oldu. Xəzər dənizinin
qərb sahilində yerləşən ölkə özünün zəngin neft və qaz yataqları
ilə Avropanın enerji ilə təmin olunmasında mühüm bazadır".
AB komissarı eyni zamanda Azərbaycan kimi enerji istehsal edən
ölkələri daha güclü dəstəkləməyin Avropa Birliyinin marağında
olduğunu qeyd edib. Günter Öttinger Dağlıq Qarabağ münaqişəsinin
həllinin də bununla əlaqəli olduğunu düşünür: "Bu istiqamətdə daha
çox iş görmək avropalıların vəzifəsidir. AB ölkələri üçün mühüm
enerji tərəfdaşı olan Azərbaycanın problemlərinə Avropada daha çox
diqqət yetirilməlidir. Nəhayət, Birləşmiş Millətlər Təşkilatının və
bir çox başqa beynəlxalq təşkilatların birmənalı qətnamələrində
göstərilir ki, Dağlıq Qarabağ regionu Azərbaycan Respublikasının
ayrılmaz tərkib hissəsidir".