Ramil Səfərov: “Hərbi xidmətimi davam etdirə bilərəm”
31 Avqust 2012 17:56 (UTC+04:00)
Bu gün Macarıstandan Bakıya
gətirilən və ölkə prezidentinin imzaladığı əfv sərəncamı ilə
azadlığa buraxılan Azərbaycan Ordusunun zabiti Ramil Səfərov ata
evinə axın başlayıb. APA-nın
Ramil Səfərovun ata evində olan əməkdaşı xəbər verir ki, onun
gəlişi münasibəti ilə qurban kəsilib.
Ramil Səfərov burada bir daha Azərbaycana qaytarılmasına, əfv
olunmasına görə ölkə prezidenti, Ali Baş komandan İlham Əliyevə
təşəkkür edib: "Səkkiz il yarım qürbətdə təkadamlıq kamerada qalsam
da, bir gün də ümidimi itirmədim. Vaxtı çatanda Ali Baş komandan
məsələni həll etdi. Mən bundan sonra da dövlətimə, millətimə xidmət
etməyə hazıram".
R. Səfərov hərbi xidmətini davam etdirəcəyi barədə ona ünvanlanan
suala cavabında bunu mümkün saydığını deyib.
Erməni zabiti qətlə yetirdiyi gün barədə suala isə "Mən o günə
qayıtmaq istəmirəm" cavabını verib.
Qeyd edək ki, bu gün Azərbaycanın Macarıstanda həbsdə olan zabiti
Ramil Səfərov Bakıya ekstradisiya olunub.
Azərbaycan prezidenti İlham Əliyev Ramil Səfərovun əfv olunması
barədə sərəncam imzalayıb. APA-nın xəbərinə görə, sərəncamda
bildirilir ki, 1977-ci ildə anadan olmuş, Macarıstanın Budapeşt
Paytaxt Məhkəməsinin 2006-cı il 13 aprel tarixli hökmü ilə ömürlük
azadlıqdan məhrum etmə cəzasına məhkum edilmiş Azərbaycan
Respublikasının vətəndaşı Səfərov Ramil Sahib oğlu cəza çəkməkdən
azad edilib.
Ramil Səfərov 25 avqust 1977-ci ildə Cəbrayıl rayonunda doğulub.
1991-ci ildə Cəmşid Naxçıvanski adına hərbi təmayüllü məktəbə daxil
olub. 1992-ci ilin sentyabrında Azərbaycan Müdafiə Nazirliyinin
sərəncamı ilə təhsilini davam etdirmək üçün Türkiyənin İzmir
şəhərinə göndərilib. Maltəpə hərbi liseyini müvəffəqiyyətlə
bitirdikdən sonra Ankara Ali Hərbi məktəbinə daxil olub və hərbi
təlim kursları keçib. 2001-ci ilin may ayından 2002-ci ilin mart
ayına qədər MN-in sərəncamı ilə Gədəbəydəki "N" saylı hərbi hissədə
tağım komandiri vəzifəsində qulluq edib. 2002-ci ilin mart ayında
MN-in sərəncamı ilə H. Əliyev adına AHKM-ə göndərilib. Qulluq
etdiyi müddətdə baş leytenant rütbəsinə qədər yüksəlib. 2004-cü
ilin yanvar ayında MN-in sərəncamı ilə NATO proqramları
çərçivəsində Macarıstanın Budapeşt şəhərində keçirilən 3 aylıq
ingilis dili kurslarına ezam olunub.
Vətənə dönməyə 20 gün qalmış - fevral ayının 19-da kurslarda
iştirak edən Qurqen Markaryan adlı erməni zabitini qətlə yetirib.
Elə həmin tarixdə Budapeştin hüquq-mühafizə orqanları tərəfindən
həbs olunub. Budapeşt Şəhər Məhkəməsinin 13 aprel 2006-cı il
tarixli hökmü ilə ömürlük azadlıqdan məhrum edilib.