Nazirlik tədbirlər planı hazırladı
2 İyun 2015 18:28 (UTC+04:00)
Rabitə və Yüksək Texnologiyalar Nazirliyində
(RYTN) "Mingəçevir Yüksək Texnologiyalar Parkı" fəaliyyətinin
təşkili ilə bağlı tədbirlər planı hazırlanıb.
Nazirlikdən Movqe.az-a verilən
məlumata görə, Rabitə və Yüksək Texnologiyalar Nazirliyi (RYTN)
"Mingəçevir Yüksək Texnologiyalar Parkı"nın fəaliyyətinin təşkili
ilə bağlı 2015-ci il üçün tədbirlər planını
təsdiqləyib. Tədbirlər planında
"Mingəçevir Yüksək Texnologiyalar Parkı"nın fəaliyyətinin təşkili,
təbliğat işlərinin genişləndirilməsi, beynəlxalq əməkdaşlığın
qurulması, yerli və xarici ekspertlər ilə görüşlərin keçirilməsi və
digər məsələlər əksini tapıb. Xatırladaq ki, Azərbaycan Respublikası Prezidentinin 26 fevral
2015-ci il tarixli 481 saylı Fərmanı ilə RYTN-in tabeliyində "YT
Park" MMC-nin Mingəçevir şəhərində istifadəsində olan 1,3 hektar
torpaq sahəsində Mingəçevir Yüksək Texnologiyalar Parkının
yaradılması qərara alınıb. Park
innovasiya məhsulunun və yüksək texnologiyaların hazırlanması,
işlənilməsi və ya təkmilləşdirilməsi məqsədi ilə elmi tədqiqatların
və təcrübə-konstruktor işlərinin aparılması və onların
nəticələrinin tətbiqi üzrə işləri həyata keçirəcək.