Tural Bayraməliyev: “Mahnılarımı satmıram
11 İyun 2015 14:12 (UTC+04:00)
Peşəkar
və gənc estrada ulduzlarının repertuarını bəstəkar və şair Tural
Bayraməliyevin imzasında silsilə mahnılar bəzəyir. Bir-birindən
movzu etibari ilə fərqlənən mahnılar dinləyici sayına görə,
liderliyini qoruyan hitlər sırasındadır. Movqe.az yeni layihələri, yaradıcılığı barədə danışan T.Bayraməliyevi
dinləyicisinə bir qədər yaxın etdi.
- Yaradıcılığımda şeir və bəstələrim eyni mahiyyəti daşıyır. Hər
ikisinə eyni baxışdan yanaşıram. Son aylar bir-birinin ardınca
meydana çıxan musiqi əsərləri və onlara yazılan sözlər, həmin
zamanın payına düşür. Yəni, nə vaxtsa yazıb, sandıqdan indi
çıxartmıram. Yaradıcılıq xüsusiyyətim belədir ki, bir şeir və
bəstəylə qane olmuram. Hesabat mənim yaradıcılıq pridmetimi ola
bilməz. Kiminsə yaradıcılığına baxıb, qonşudan geri qalmamaq
prinsipi yaradıcılığıma tamamilə ziddir. Özü gəlib qapımı döyür.
Bəzi yaradıcı insanlarla ünsiyyətdə belə bir şeyin şahidi olmuşam
ki, royalın arxasında oturub, nəsə axtarırlar... Bu cəhətdən mənim
yaradıcılığım fərqlidir. Əlimə qələm alıb, saatlarla düşünməmişəm
ki, ağlıma gələn münasib fikri cümlələrə düzüm. Bir ayda üç mahnı
yaza bilərəm, amma elə zaman olub ki, aylarla nə şeir yaranıb, nə
musiqi. Özü gəlib qapımı döyüb, məni tapanda, zamanıdır, deyə
düşünmüşəm. Eşitdiyiniz mahnıların hamısı belə yaranıb.
- Barmaqla sayıla bilən müəlliflərdənsiniz ki,
mahnılarınızı maddiyyatla ölçmürsünüz.
- Bəli, bunu xüsusi vurğulamaq istəyirəm ki, mahnılarımı satmıram.
Hansı müğənni mahnımı səsləndiribsə, onu layihə şəklində, aranjiman
etdirərək, ona təqdim etmişəm. Aranjiman işi Türkiyədə peşəkar
musiqiçilər tərəfindən aparılıb. Müğənnilərin kimliyini də özüm
seçirəm. Demək olar ki, bütün hazırlanma proseslərində özüm
yaxından iştirak edirəm. Yaradıcılıq məhsulumun qayğısına belə
qalıram (gülür). Mənə bir çox sayda müğənnilər müraciət edir.
Səsini bəyənmədiyim müğənni ilə çalışmıram. Bu məsələyə artıq daha
ciddi yanaşıram.
- Mahnılarını özünə bu qədər doğma bilən müəllifin
kaprizli müğənnilərlə çalışmağı çətin deyilki? Müdaxilələrə yol
verirsiz?
- Mahnılarıma bir balaca müdaxilə olsa, onda o, mənimki olmaqdan
çıxır. Hər şeyi nizamında ifaçıya təqdim etdiyim üçün müdaxiləyə
ehtiyac qalmır. Həm də buna icazə vermirəm. Artıq mənimlə çalışan
sənətçilər bu xüsusiyyətimə bələddirlər. Günay İbrahimli ilə mahnı
hazırlanarkən, mənə "mən kapriz göstərməkdən, siz məndən betərsiz"
dedi. Doğrudan, mən müğənnilərdən də betər tələbkar və kaprizliyəm.
Bütün bunlar dinləyisicyə qüsursuz və zövqlü mahnı bəxş etməkdir.
Vaxtilə mahnımı təqdim edib, kənara çəkildiyimdə baxırdım ki,
yaradıcılıq məhsulum mənimki olmaqdan çıxır. Yadlaşır. Melodiyanı
yazan mənım. Mahnının tərkibində hansı alətləri, gəzişmələri görmək
istəyirəmsə, onu əldə etməyə çalışıram. Peşəkar müdaxiləsi olanda
isə hörmətlə yanaşıram. Hər detalına həssas yanaşdığım üçün
mahnılarım uğur qazanır.
- Türkiyədəki musiqiçilərlə çalışırsız. Burda sizi
qane etməyən nədir?
- Bizim peşəkar musiqiçilərimizin
olduğu danılmazdır. Mən dinləyicinin tələbatını nəzərə alıram.
Burda əsas söhbət texnikanın inkişafından gedir. Bunun sayəsinə
türkiyəli musiqiçilərin konsert layihələri davamlı uğurları,
inkişafı ilə seçilir. Əsas fəqr ondan ibarətdir ki, bizim
musiqiçilər hər gün toy səhnəsindədir. Bəzən, mahnılarımı dəyişib,
toy mahnıları səviyyəsinə gətirib çıxarırlar. Bu da özününkü
olmaqdan çıxır. Bir növ bayağılaşdırırlar. Mahnı müasirliyini,
özəlliyini itirir. Musiqini inkişaf etdirməliyik, onu yalnız toy
səhnəsində məhdudlaşdırmamalıyıq.
- Gənc həmkarlarınızın yaradıcılığını
izləyib, onlarla rəqabətə girirsiz?
- Nə qələm adamları, nədəki musiqiçilərlə rəqabətə girmirəm.
Səməd Vurğun, Fikrət Əmirov və s. şəxsiyyətlərin dövründə yüzlərlə
şairi, bəstəkarı olub. Amma o zamandan indiyə qalan məhz istedadlı
və işinə peşəkar səviyyədə yanaşmağı bacaranlar olub. Bu gün kimin
daha yaxşı yazdığını, musiqi sənətinə öz tövhəsini verənləri
ictimaiyyət və zaman formalaşdıracaq. Mən hər bir mənada hər şeyin
yaxşısını düşünürəm.
- Son bir neçə ay yaradıcılığınzda fasilə
oldu. Bunun arxasında sadəcə bir boşluq durur, yoxsa böyük
layihələr?
- Mənim fəaliyyətim sırf mahnı
yaradıcılığı üzərində dayanmayıb. Başqa işlərim də var. Həm bu
nöqteyi nəzərdən, həm də bir müddət Bakıda olmadığımdan mahnı
fəliyyətimə ara vermişdim. Layihələr müəyyən fasilələrlə hər zaman
nəzərdə tutulub. Yaxın günlərdə də olacaq. Hələlik xalq artisti
Brilliant Dadaşova ilə hazırlanan mahnıdan danışa bilərəm. Mahnı
Türkiyədə aranjiman olunub. Bu günlərdə lentə yazılacaq. Brilliant
xanım etiraz etməsə, düşünmüşük ki, mahnı hazır olandan sonra onun
klipi Londonda çəkilsin. Qərara gəlmişəm ki, bundan sonra
ekranlaşdırılacaq mahnılarımın rejissor işini Aqil M.Quliyevə
həvalə edim. Onunla daha bir ekran işimiz nəzərdə tutulub ki, həmin
layihənin ifaçısının adını hələlik sirr saxlayıram.
- Çalışdığınız müğənnilərlə sizi yalnız
yaradıcılıq teli bağlayır?
Yəni dostluq etdiyinz, dərdləşdiyiniz sənətçilər
var?
- Mən yalnız kişi sənətçilərin bir qismi ilə dostluq edirəm.
- Sabahdan ölkəmizdə birinci Avropa Oyunları
başlayır. Bildiyimizə görə, idmanla bağlılığınız olub.
- Zamanında peşəkar kikboksla məşğul olmuşam. Yığma komandada
çalışmışam. 2005-ci ildə Yaltada keçirilən dünya çempionatında
bürünc medala layiq görülmüşəm. Dəfələrlə beynəlxalq turnirlərdə
qızıl medal mükafatçısı olmuşam. İndi həvəskar kimi məşğul oluram.
Çox sevinirəm ki, ilk Avropa Oyunları məhz Odlar Diyarında
keçirilir. Ölkəmizin adı ilə bağlı olan hər bir nailiyyət bir
vətəndaş kimi məni ürəkdən sevindirir. Və bu cür mötəbər
tədbirlərdə vətəndaş dəstəyi göstərməyə hazıram. Eyni zamanda
ailəmlə yarışları stadiondan canlı izləyəcik.