Həsən Əliyev: “Özümü ən bədbəxt insan kimi hiss edirdim…”
16 İyun 2015 10:40 (UTC+04:00)
Bakı 2015-in yarımfinalında erməni rəqibinə uduzan pəhləvanımız
keçirdiyi təəssüf hissini sosial şəbəkədəki facebook hesabında
paylaşıb. Movqe.az-ın məlumatına görə,
Dünya və Avropa çempionumuz Həsən Əliyev finala vəsiqə qazana
bilməməsi və erməni idmançıya məğlub olmasına görə təəssüflənsə də,
ona olan dəstəyə görə xoşbəxt olduğunu bildirib: "Sözün əsl
mənasında deməyə ifadə tapmıram. Bir onu deyə bilərəm ki, mənə
layiq olmadığım dəyəri verdiniz, layiq olmadığım işi etdiniz. Buna
görə millətim qarşısında baş əyirəm. Bir gün əvvəl özümü ən bədbəxt
insan kimi hiss edirdim, bu gün məni ən xoşbəxt insan etdiniz. Bu
yaxşılığın qarşısını sadəcə Allah verə bilər, mən acizəm!"
Mükafatlandırma zamanı başını aşağı salan idmançımızın bu görüntüsü
sosial şəbəkə istifadəçiləri tərəfindən skrinşot edilərək
"basinidiktut" haştağı ilə paylaşılıb və pəhləvanımıza ruhdan
düşməmək üçün ona dəstək verilib.
Qeyd edək ki, 25 yaşlı pəhləvanımız ilk görüşündə gürcüstanlı
Saçino Davitaya ilə qüvvəsini sınayıb və 4:2 hesabı ilə qələbə
qazanıb. O, 1/8 finalda xorvatiyalı Doniyel Yaneçiçlə güləşib.
Çəkisinin lideri bu dəfə də asanlıqla qalib gəlib. Rəqibini 5:0
hesabı ilə məğlub edən Əliyev 1/4 finalda Mixail Simyonovla
(Belarus) qarşılaşıb. Dünya çempionumuz bu sınaqdan da uğurla çıxıb
– 3:0. Yarımfinalda Ermənistan güləşçisi Miqran Arutyunyanla
qarşılaşan Həsən 3:0 hesabı ilə öndə olsa da üstünlüyünü qoruya
bilməyib və 5:8 hesabı ilə uduzub.