Deputatdan erməniyə uduzan idmançıya dəstək

16 İyun 2015 11:00 (UTC+04:00)

"İdmandan xəbəri olmayan, idman ücün, idmançı üçün bir iş görməyən adamcıqlar bu gün idmançını müzakirəyə çıxarıb, onları tənqid, hətta təhqir edirlər".

Movqe.az xəbər verir ki, bu fikirləri Azərbaycan Respublikası Kinqboks Federasiyasının prezidenti, deputat Adil Əliyev bildirib.

A.Əliyevin sözlərinə görə, idmançıya məşqçisindən başqa heç kimin güldən ağır söz deməyə ixtiyarı yoxdur: "Əvvəla, belə mötəbər yarışlara elə-belə, sıradan idmançılar buraxılmırlar. Yəni, nə biz tərəfdən, nə də rəqib tərəfdən. Yarışlarda isə bir çəki dərəcəsində yalnız bir qızıl medal olur ki, onun üstündə güclü mübarizə aparılır. Ölkəsindən və millətindən asılı olmayaraq daha hazırlıqlı və bəxti gətirən idmançı qalib çıxa bilər. Hamıya məlumdur ki, iki idmançıdan biri qalib olmalıdır. Bu dəfə idmançımızın bəxti gətirmədi. Nə etmək olar? Bu idmandır. İndi durub hamımız düşək bu idmançının üstünə ki, sən uduzmusan. Əgər, biz bu cür kampaniyaya dəstək versək, başqa idmançılarımızı da ruhdan salarıq. Nəzərə alsaq ki, bizi hələ çox maraqlı yarışlar gözləyir. O yarışlarda da başqa millətin nümayəndələri iştirak edəcəklər. Dostlar gəlin birlikdə, bu ağır və şərəfli işdə idmançılarımızın yanında olub, onlara dəstək olaq. Allah millətimizə kömək olsun".