Sahibkarlara 88,4 milyon manat kredit verilib

18 İyun 2015 22:08 (UTC+04:00)
Bu ilin ötən dövrü ərzində 2700-dən çox sahibkara 88,4 milyon manat güzəştli kredit verilib. Bu kreditlərdən istifadə etməklə investisiya layihələrinin reallaşdırılması 6200-dən çox yeni iş yerinin yaradılmasına imkan verir. ANS PRESS-in məlumatına görə, bunu İqtisadiyyat və Sənaye Nazirliyinin Sahibkarlığa Kömək Milli Fondunun (SKMF) Gədəbəy rayonunun Slavyanka kəndində sahibkarlığın güzəştli kreditləşdirilməsi məsələlərinə dair keçirdiyi işgüzar forumda fondun icraçı direktoru Şirzad Abdullayev deyib.

Bildirilib ki, ümumilikdə indiyədək Gəncə-Qazax iqtisadi rayonunda fəaliyyət göstərən sahibkarlıq subyektlərinin 5374 investisiya layihəsinin maliyyələşdirilməsinə 197,5 milyon manat güzəştli kredit verilmiş, digər sahələrlə yanaşı, müasir texnologiyaların tətbiqinə əsaslanan logistik mərkəzlərin, taxıl anbarlarının, quşçuluq fabrikinin, cins iri buynuzlu heyvandarlıq kompleksinin, çörək zavodlarının, meyvə-tərəvəz, ət, süd emalı, tikinti materialllarının istehsalı müəssisələrinin, istixana, intensiv bağçılıq təsərrüfatlarının yaradılması və s. sahələr üzrə investisiya layihələri maliyyələşdirilib, 24 mindən çox yeni iş yerinin açılması imkanı yaradılıb.

İşgüzar forum çərçivəsində Gədəbəy və ətraf rayonlardan olan 61 sahibkara 1,4 milyon manat güzəştli kredit verilib. Verilmiş kreditlər əsasən, heyvandarlıq, tərəvəzçilik, üzümçülük, kartofçuluq, quşçuluq, limonad istehsalı və s. sahələrin inkişafına yönəldiləcək. Bu kreditlərin reallaşdırılması hesabına 120-dən çox yeni iş yerinin açılması mümkün olacaq.

Forum çərçivəsində Gədəbəy rayonunun Zəhmət kəndində güzəştli kredit ayrılmış ildə 6 milyon litr limonad istehsal etmək gücündə olan zavodun fəaliyyətinə baxış keçirilib. Zavoda Sahibkarlığa Kömək Milli Fondu tərəfindən 1,6 milyon manat kredit verilib. Hazırda müəssisədə 50-yə yaxın işçi çalışır. 

İşgüzar forumun məqsədi sahibkarlara güzəştli kreditlərin alınması mexanizmi barədə ətraflı məlumatların verilməsi, Gədəbəydə həyata keçirilməsi məqsədəuyğun hesab olunan nümunəvi layihələrin təqdim olunması, sahibkar-müvəkkil kredit təşkilatı münasibətlərinin möhkəmləndirilməsi, sahibkarların investisiya layihələrinin maliyyələşdirilməsidir. 

Səksənə yaxın sahibkarın iştirak etdiyi forum çərçivəsində Gədəbəy rayonunun iqtisadi potensialının reallaşdırılması məqsədilə prioritet hesab olunan ixtisaslaşdırılmış "yaşıl market"in, cins heyvandarlıq, kartofçuluq, yüksək məhsuldar kartof toxumçuluğu və arıçılıq təsərrüfatlarının, meşə meyvələrinin, balın sənaye üsulu ilə emalı və qablaşdırılması, şirniyyat məhsullarının istehsalı müəssisələrinin yaradılması üzrə nümunəvi investisiya layihələrinin təqdimatı keçirilib, kiçik həcmli investisiya layihələrinin ümumi dəyərinin 100%-dək hissəsinin dövlətin güzəştli kreditləri hesabına maliyyələşdiriləcəyi bildirilib, sahibkarlara nümunəvi layihələr və metodiki materiallar paylanıb.