“Ramil Səfərovla bağlı addım atanda riskini anlayırdıq”
21 Sentyabr 2012 16:04 (UTC+04:00)
"Macarıstanda təhlükəsizliyimiz
yerli hökumət tərəfindən hələlik yüksək səviyyədə təmin
olunur". APA-nın məlumatına
görə, bu fikirləri jurnalistlərə açıqlamasında Azərbaycanın
Macarıstanda fövqəladə və səlahiyyətli səfiri Vilayət Quliyev
bildirib.
O qeyd edib ki, ermənilərin heç bir təhdidi istənilən halda
Azərbaycan diplomatlarını qorxutmur: "Qurddan qorxan heç vaxt
meşəyə getməz. Ramil Səfərovla bağlı biz məlum addımı atanda onsuz
da bunun müəyyən risklər doğuracağını anlayırdıq". Səfirin
sözlərinə görə, Azərbaycan və Macarıstan münasibətlərində heç bir
mənfi dəyişiklik baş verməyib: "Əvvəlcədən planlaşdırılmış bütün
tədbirlər qüvvədə qalıb". Səfir bu il oktyabrın 8-9-da Budapeştdə
Macarıstan-Azərbaycan hökumətlərarası komissiyanın iclasının
keçiriləcəyini deyib.