Rəfsəncaninin oğlu İrana qayıdıb
24 Sentyabr 2012 16:53 (UTC+04:00)
İran Məsləhət Şurasının sədri, sabiq prezident
Əli Əkbər Haşimi Rəfsəncaninin oğlu Mehdi Haşimi sentyabrın 23-də
yerli vaxtla 19.30-da ölkəyə qayıdıb.APA-nın "Fars" xəbər agentliyinə istinadən
məlumatına görə, M. Haşimini Tehran hava limanında qardaşları ilə
birlikdə ailənin vəkili, eyni zamanda prokurorluq nümayəndəsi və
təhlükəsizlik qüvvələri qarşılayıb.
Sabiq prezidentin oğlunun həbs olunduğu xəbəri yayılsa da, ailənin
vəkili Seyid Mahmud Əlizadə Təbatəbai belə bir şeyin baş
vermədiyini bildirib. Onun sözlərinə görə, M. Haşimi Tehran hava
limanındakı müvafiq proseduru tamamlandıqdan sonra ata evinə gedib.
Məlumata görə, Tehran prokurorunun müavini hava limanında Mehdi
Haşimiyə cinayət işi açıldığını deyərək, onun dilindən 24 saat
içərisində özünü prokurorluğa təslim edəcəyinə dair iltizam
alıb.
Qeyd edək ki, İranda 2009-cu ildəki mübahisəli prezident
seçkisindən sonra kütləvi iğtişaşların nəticələnməsi ilə keçirilən
aksiyaların təşkilində günahlandırılan M. Haşimi Böyük Britaniyaya
qaçmışdı.