Bakıda beynəlxalq media konfransı keçirilir -FOTOLAR
25 Sentyabr 2012 18:50 (UTC+04:00)
Movqe.Az xəbər verir
ki, bu gün Bakıda "Azərbaycanda media mühiti: mövcud durum və yeni
çağırışlar" adlı beynəlxalq konfrans işə
başlayıb. Konfrans Azərbaycan
Jurnalist Həmkarlar İttifaqı (JuHİ) tərəfindən icra olunan "Etik
Jurnalistika Təşəbbüsləri-Azərbaycan" layihəsi çərçivəsində Avropa
İttifaqının Azərbaycan nümayəndəliyinin dəstəyi ilə keçirilir.
Tədbiri giriş sözü ilə açan JuHİ-nin rəhbəri Müşfiq Ələsgərli
konfransın mahiyyətindən söz açdı. Sonra söz alan qonaqlar mövzu
ilə bağlı fikirlərini bölüşdülər. Tədbirdə çıxış
edən Azərbaycan Respublikasının
Prezidenti yanında Kütləvi İnformasiya Vasitələrinin İnkişafına
Dövlət Dəstəyi Fondunun icraçı direktoru Vüqar Səfərli dövlət-media
münasibətlərinə toxundu. Onu fikrincə Azərbaycan hökuməti medianın
azadlığı və sərbəstliyi üçün kifayət qədər uğurlu işlər
görüb.
Günün ikinci yarısı
panellərlə davam edən konfransa moderatorluğu Orta Asiya və Güney
Qafqaz Söz Azadlığı Şəbəkəsi (CASCFEN) rəhbəri Azər Həsrət
edib.
Əsas çıxışçı - Britaniya Milli Jurnalistlər
Birliyinin eksperti Arjuman Vajidin "Levesondan öyrənilmiş dərslər"
barədə konfrans iştirakçılarına təqdimatı olub.
Tədbirdə həmçinin Lent.az İnformasiya Agentliyinin baş direktoru
Qabil Abbasoğlunun da çıxışı dinlənilib. O, "şəxsi həyatın
qorunması və media: mövcud durumun təhlili" mövzusunda danışıb.
Qeyd edək ki, konfrans sabah da öz işini
davam etdirəcək. Tədbirdə Azərbaycanda media azadlığı və
təhlükəsizliyi, mövcud durum və yeni çağırışlar, ictimai yayım
sahəsində yeni çağırışlar, demokratik medianın inkişaf
etdirilməsində jurnalist ittifaqlarının rolu və sair mövzular
müzakirə olunacaq. Sabahkı panellərdə yerli və xarici media
ekspertlərinin müxtəlif mövzular üzrə çıxışları
planlaşdırılır.