Azərbaycanda vəbaya qarşı profilaktik tədbirlər gücləndirilib-Özəl
5 Avqust 2015 13:10 (UTC+04:00)
Azərbaycanda havaların isti keçməsi ilə əlaqədar
içməli açıq su hövzələrində vəbaya qarşı profilaktik tədbirlər
gücləndirilib. Movqe.az-a bu barədə məlumatı
Səhiyyə Nazirliyi Taun Əleyhinə
Stansiyasının direktor müavini Şair Qurbanov verib. Ş. Qurbanov
deyib ki, vəba əsasən içməli su ilə keçdiyindən, xüsusilə yay
aylarında bu xəstəliyin vibrionlarının aktivləşməsi üçün
əlverişli şərait yaranır: "Vəbanın kəskin xəstəlik törədən
variantları və az zərərli, yəni, elitor, kifayət qədər daşıyıcı
variantları var. Xəstəliyin yayılmasına isə su hövzələrində həmin
vibrionların artması səbəb olur. Hər il mayın 1-dən noyabrın
1-dək, həftədə bir dəfə olmaqla, bütün açıq su mənbələrində və eyni
zamanda, insanların məişətdə istifadə etdiyi suların mənbəyində
müayinələr aparılır. Yəni, Azərbaycan ərazisində 112 nöqtədə
müayinələr həyata keçirilir. Xaricdən ölkəmizə gələn şəxslər isə
xəstəliklərlə bağlı gömrük-keçid məntəqələrində sorğudan keçir.
Vəba vibronlarının yayılması üçün 37-40 dərəcə optimal şərait
hesab edilir. Ona görə də, xüsusilə yay aylarında insanlar
keyfiyyətli sudan istifadə etməlidirlər. Yayda maye çox qəbul
edildiyindən, mədədə turşuluq azalır. Turşuluğun az olduğu mühit
isə vəba vibronlarının inkişafı üçün əlverişli şərait hesab edilir.
Məhz ona görə də, yayda vəba xəstəliyinin yayılması üçün potensial
şərait yaranır".
Ş. Qurbanov deyir ki, Azərbaycanda vəba
ocağı olmasa da, vaxtilə ölkəmizdə də bu cür xəstəlik qeydə
alınıb. Ş.Qurbanovun sözlərinə görə, son 30 ilin təcrübəsi
göstərir ki, vəba əsasən su vasitəsilə yayılır. Içməli su problemi
olan ölkələrdə insanlar bu xəstəliyə yoluxa bilirlər. Vəbaya
tutulan şəxsin orqanizmi xeyli miqdarda maye itirir.