Bu ilin iyul ayında Əmək və Əhalinin Sosial Müdafiəsi Nazirliyinin (ƏƏSMN) "Elektron hökumət" portalı üzərindən təqdim etdiyi elektron xidmətlərdən 178492 dəfə istifadə olunub. Nazirliyin İctimaiyyətlə əlaqələr şöbəsindən verilən məlumata görə, bu rəqəm iyun ayı ilə müqayisədə 13,1 faiz çoxdur.
Ötən ay əhali ƏƏSMN-in "Əmək müqaviləsi bildirişlərinin qeydiyyata alınması və bu barədə işəgötürənə məlumatın verilməsi" elektron xidmətindən 109737 dəfə faydalanıb. Bu e-xidmət, həmçinin ƏƏSMN-in "Əmək müqaviləsi bildirişləri barədə məlumatların işçilər tərəfindən əldə edilməsi" e-xidməti 47835 ədəd və "İş yerinə dair arayış" e-xidməti 18547 ədəd istifadə sayı ilə yenə də əhalinin "Elektron hökumət" portalı üzərindən ən çox faydalandığı e-xidmətlər sırasında qərarlaşıb.
"Əmək müqaviləsi bildirişlərinin qeydiyyata alınması və bu barədə işəgötürənə məlumatın verilməsi" e-xidməti 2014-cü ilin ortalarında əmək müqaviləsi bildirişi üzrə elektron informasiya sisteminin tətbiqi ilə əlaqədar əmək münasibətlərinin elektron qeydiyyatı məqsədilə əhaliyə təqdim edilib. Yeni sistemin tətbiqi "Əmək müqaviləsi bildirişləri barədə məlumatların işçilər tərəfindən əldə edilməsi", habelə "İş yerinə dair arayış" e-xidmətlərinin də yaradılmasına imkan yaradıb.
Ümumilikdə, bu ilin yanvar-iyul aylarında vətəndaşlar ƏƏSMN-in bütün elektron xidmətlərindən 1 milyon 272 min 164 dəfə yararlanıb ki, bu da həmin dövrdə "E- hökumət" portalı üzrə ümumi istifadə sayının 17 faizini təşkil edir.