Naxçıvan Muxtar Respublikası Ali Məclisinin sədri Vasif Talıbov Naxçıvan Muxtar Respublikasının Fəxri Xiyaban İdarəsinin yaradılması haqqında sərəncam verib.
APA-nın məlumatına görə, sərəncama əsasən "Naxçıvan Muxtar Respublikasının Fəxri Xiyaban İdarəsi haqqında Əsasnamə" də təsdiq edilib.
Əsasnaməyə əsasən Naxçıvan Muxtar Respublikasının Fəxri Xiyaban İdarəsi Fəxri Xiyabanın idarə edilməsi sahəsində dövlət nəzarətini həyata keçirən orqandır. Fəxri Xiyaban İdarəsinin fəaliyyət istiqamətlərinə Fəxri Xiyabana dair planlaşdırma işlərini təşkil etmək, Fəxri Xiyabanla bağlı zəruri tədbirləri və qanunvericiliyin tələblərinə əməl olunmasına dövlət nəzarətini həyata keçirmək, öz səlahiyyətləri çərçivəsində dəfn mərasimlərini təşkil etmək, Fəxri Xiyabanda təmir və bərpa işlərini həyata keçirmək və qanunvericiliklə müəyyən edilmiş digər istiqamətlərdə fəaliyyət göstərmək daxildir. İdarənin fəaliyyətinə Naxçıvan Muxtar Respublikasının Ali Məclisi tərəfindən vəzifəyə təyin və vəzifədən azad edilən İdarənin direktoru rəhbərlik edir. İdarənin direktoru İdarəyə həvalə olunmuş vəzifələrin yerinə yetirilməsi və hüquqların həyata keçirilməsi üçün şəxsən məsuliyyət daşıyır.